Soltústik Qazaqstan oblysyna koronavirýsqa qarsy 1200 doza vaktsina jetkizilse, sonyń 900-i medqyzmetkerlerge salyndy. Ekpe alǵandardyń jaǵdailary jaqsy, dep habarlaidy "Ult aqparat".
SQO-daǵy koronavirýs infektsiiasyna qatysty jaǵdai boiynsha búgin densaýlyq saqtaý basqarmasy basshysynyń orynbasary Qumar Kúsemisov pen oblystyń bas sanitar dárigeri Áset Jumataev aityp berdi.
Áset Jumataev óńirde alǵashqylardyń biri bolyp KVI-ǵa qarsy ekpe jasatty.
«1-aqpan kúni vaktsina egildi. Birinshi kúni, árine ine salǵan jer aýyrdy. Álsizdik boldy. Vaktsina alǵanyma búgin úshinshi kún. Ózimdi jaqsy sezinemin. Aýytqýlar bolǵan joq. Sol sebepti barlyǵyn ekpe salýǵa shaqyrtý túskende odan bas tartpaýǵa shaqyramyn. Osylaisha biz ózimizdiń ǵana emes, jaqyndarymyzdyń densaýlyǵyn da qorǵaimyz», - dedi SQO-nyń bas sanitar dárigeri.
Qazirgi tańda SQO-da meditsina qyzmetkerleriniń 900-i vaktsina alyp úlgerdi.
«Óńirde vaktsina qoiý josparly túrdi ótip jatyr. Ekpe alǵandar dárigerlerdiń baqylaýynda. Úsh kún boiy qońyraý shalyp, jaǵdailaryn bilip turady. Osy kúnge deiin eshqandai asqynýlar tirkelgen joq.
Immýndyq vaktsina bolǵandyqtan onyń aǵzaǵa óz áseri bar. Alǵashqy kúnderi dene qyzýy kóterilip, ine salǵan jer aýyrýy múmkin. Álsizdik bolady. Bul – qalypty jaǵdai.
Vaktsina alǵandardyń ishinde 4 adamda dene qyzýy 37,5-38 gradýsqa deiin kóterildi. Olar paratsetamol ishti», - deidi densaýlyq saqtaý basqarmasy basshysynyń orynbasary Qumar Kúsemisov.
Dárigerdiń aitýynsha, meditsina qyzmetkerleriniń arasynda ekpe jasatýdan bas tartqandar bolmaǵan.
«Meditsina qyzmetkerleri vaktsina alýdyń qanshalyqty mańyzdy ekenin jaqsy túsinedi. Óitkeni búgingi tańda KVI-men kúrestiń eń tiimdi joly osy vaktsina salǵyzý. Óitkeni ázirge virýsty joiatyn preparattar tabylǵan joq.
Karantindik shekteý sharalarynyń, árine, juqtyrǵandar sanyn azaitýda nátijesi bar. Biraq bul infektsiiany biz ujymdyq immýnitet alý arqyly ǵana jeńe alamyz», - dedi Qumar Kúsemisov.
SQO-da búginde koronavirýs infektsiiasyn juqtyrǵandar sany 11 179 adamǵa jetti. Óńirdiń infektsiialyq statsionarlarynda qazir 452 adam em alyp jatyr. Emdeý oryndary 38 %-ǵa ǵana tolyq.
