SQO-da 17 jastaǵy jasóspirim alańqaidan granata taýyp aldy, – dep habarlaidy Polisia.kz.
Qyzyljar aýdanyndaǵy aýyldardyń biriniń 17 jastaǵy turǵyny erekshe zat taýyp alǵan. Ol alańqaidan korroziia belgilerimen granataǵa uqsas zatty anyqtaǵan.
Bala ony tátesiniń úiine ákelgen, al tátesi óz kezeginde politsiiaǵa habarlaǵan.
Sokolov poselkelik politsiia bólimshesiniń qyzmetkerleri oqiǵa ornyn qorshaýǵa alyp, jaqyn mańdaǵy úsh úidiń jeti turǵynyn qaýipsiz jerge kóshirdi. Oqiǵa ornyna jetken jarǵysh-tehnikter qaýipti zatty arnaiy qalypqa saldy. Tabylǵan zat keńestik zamannan qalǵan jaiaý áskerde qoldanylatyn «ÝZRGM» tutandyrǵyshy bar «RGD» granatasy bolyp shyqty.
«Granata saraptamaǵa jiberildi, keiin arnaiy poligonda joiylatyn bolady. Jarylǵysh zattarǵa uqsas zat tabylǵan jaǵdaida zariadtyń ózdiginen jarylýyn boldyrmaý úshin olardy ustaýǵa, ornynan qozǵaýǵa bolmaitynyn eske salamyz», - deidi Qyzyljar aýdany politsiia bólimi bastyǵynyń mindetin atqarýshy Nurlyjan Aqtanov.
