Foto: sk.kz
Energetika ministri Almasadam Sátqaliev qys boiy apattan kóz ashpaǵan jylý elektr ortalyqtaryna barmaǵany úshin Májilis depýtattarynan sóz estidi, dep habarlaidy "Ult aqparat" Sputnik Qazaqstan agenttigine silteme jasap.
Depýtat Edil Jańbyrshinniń aitýynsha, Sátqalievtiń Energetika ministri bolǵanyna úsh ai ótse de, sheneýnik áli kúnge deiin máselesi qordalanǵan qalalarǵa barmaǵan.
"Prezident barady, depýtattar barady, biraq energetika ministri ne Ekibastuzda, ne Ridderde, ne Temirtaýda, ne Kentaýda, ne Arqalyqta, tipti myna Astanadaǵy úshinshi jylý elektr ortalyǵynda bolmaǵan. Sonda bul qalai jumys isteidi? Energetika salasy - kabinette otyryp jasaityn jumys emes. Ol - aiaqpen júrip, qolmen ustap kórip baryp retteitin másele", - deidi Jańbyrshin.
Osy oraida depýtat Sátqalievtan aldaǵy jylý berý maýsymyna qai qalalar daiyn bolmaitynyn surady.
"Kez kelgen basshynyń qolynda karta bolady. Sizde eń bolmasa karta bar ma? Biz qai óńirde, qai jerge jáne qai ýaqytta modernizatsiia jasaimyz? Qaitadan quramyz nemese jańasyn salamyz degen siiaqty. Aqshasy, merzimi kórsetilgen karta bar ma?", - dep saýal joldady májilismen.
Energetika ministri Almasadam Sátqaliev óńirlerdi aralaý kestesi ázirlengenin jáne barlyq nysan jergilikti atqarýshy organdarmen kelisilgenin atap ótti.
"Roman Vasilevich (Skliar, vitse-premer - red.) te barady, biz búkil jumysty úilestirdik. Nege búginge deiin barmadyq? Óitkeni kóptegen nysanda jóndeý jumystary áli bastalǵan joq. Jóndeý bastalǵanyn kútip otyrmyz. Bizde barlyq jóndeýdiń kestesi bar, baqylaýda ustap otyrmyz", - dep jaýap berdi ministr.
Sátqaliev Jylý elektr ortalyqtarynyń kartasy da bar ekenin aitty, tipti ony kórsetti de. Kartada jylý elektr ortalyqtary táýekel deńgeiine qarai qyzyl, sary aimaqtarǵa bólingen.
Ministrdiń aitýynsha, Semeidegi №1 JEO, Pavlodardaǵy №2 JEO, Shymkenttegi №3 JEO, MAEK-Qazatomónerkásip №1 JEO, Qazatomónerkásip №2 JEO, Petropavldaǵy №2 JEO, Jezqazǵan, Ridder, Tekkeli, Shahtinskdegi JEO-lar boiynsha qaýip bar.
Osy kezde Májilis tóraǵasy Erlan Qoshanov sózge aralasty.
"Almasadam Maidanuly, sizder jinalam degenshe, qys túsedi. Keste daiyn bolsa, solai dep aityńyz. Nege bizge búkil kesteni baiandap jatyrsyz? Jalpy suraq durys qoiylyp otyr. Prezident jylý elektr ortalyqtaryna, qazandyqtarǵa, barlyq nysanǵa ózi barady, jóndeý jumystary bastaldy ma, joq pa oǵan qaramaidy. Al sizder kesteni endi ǵana ázirlep bitirdińizder", - dep túiindedi spiker.
video: Tengrinews.kz
