فوتو: sk.kz
ەنەرگەتيكا مينيسترٸ الماسادام سەتقاليەۆ قىس بويى اپاتتان كٶز اشپاعان جىلۋ ەلەكتر ورتالىقتارىنا بارماعانى ٷشٸن مەجٸلٸس دەپۋتاتتارىنان سٶز ەستٸدٸ, دەپ حابارلايدى "ۇلت اقپارات" Sputnik قازاقستان اگەنتتٸگٸنە سٸلتەمە جاساپ.
دەپۋتات ەدٸل جاڭبىرشيننٸڭ ايتۋىنشا, سەتقاليەۆتٸڭ ەنەرگەتيكا مينيسترٸ بولعانىنا ٷش اي ٶتسە دە, شەنەۋنٸك ەلٸ كٷنگە دەيٸن مەسەلەسٸ قوردالانعان قالالارعا بارماعان.
"پرەزيدەنت بارادى, دەپۋتاتتار بارادى, بٸراق ەنەرگەتيكا مينيسترٸ نە ەكٸباستۇزدا, نە ريددەردە, نە تەمٸرتاۋدا, نە كەنتاۋدا, نە ارقالىقتا, تٸپتٸ مىنا استاناداعى ٷشٸنشٸ جىلۋ ەلەكتر ورتالىعىندا بولماعان. سوندا بۇل قالاي جۇمىس ٸستەيدٸ? ەنەرگەتيكا سالاسى - كابينەتتە وتىرىپ جاسايتىن جۇمىس ەمەس. ول - اياقپەن جٷرٸپ, قولمەن ۇستاپ كٶرٸپ بارىپ رەتتەيتٸن مەسەلە", - دەيدٸ جاڭبىرشين.
وسى ورايدا دەپۋتات سەتقاليەۆتان الداعى جىلۋ بەرۋ ماۋسىمىنا قاي قالالار دايىن بولمايتىنىن سۇرادى.
"كەز كەلگەن باسشىنىڭ قولىندا كارتا بولادى. سٸزدە ەڭ بولماسا كارتا بار ما? بٸز قاي ٶڭٸردە, قاي جەرگە جەنە قاي ۋاقىتتا مودەرنيزاتسييا جاسايمىز? قايتادان قۇرامىز نەمەسە جاڭاسىن سالامىز دەگەن سيياقتى. اقشاسى, مەرزٸمٸ كٶرسەتٸلگەن كارتا بار ما?", - دەپ ساۋال جولدادى مەجٸلٸسمەن.
ەنەرگەتيكا مينيسترٸ الماسادام سەتقاليەۆ ٶڭٸرلەردٸ ارالاۋ كەستەسٸ ەزٸرلەنگەنٸن جەنە بارلىق نىسان جەرگٸلٸكتٸ اتقارۋشى ورگاندارمەن كەلٸسٸلگەنٸن اتاپ ٶتتٸ.
"رومان ۆاسيلەۆيچ (سكليار, ۆيتسە-پرەمەر - رەد.) تە بارادى, بٸز بٷكٸل جۇمىستى ٷيلەستٸردٸك. نەگە بٷگٸنگە دەيٸن بارمادىق? ٶيتكەنٸ كٶپتەگەن نىساندا جٶندەۋ جۇمىستارى ەلٸ باستالعان جوق. جٶندەۋ باستالعانىن كٷتٸپ وتىرمىز. بٸزدە بارلىق جٶندەۋدٸڭ كەستەسٸ بار, باقىلاۋدا ۇستاپ وتىرمىز", - دەپ جاۋاپ بەردٸ مينيستر.
سەتقاليەۆ جىلۋ ەلەكتر ورتالىقتارىنىڭ كارتاسى دا بار ەكەنٸن ايتتى, تٸپتٸ ونى كٶرسەتتٸ دە. كارتادا جىلۋ ەلەكتر ورتالىقتارى تەۋەكەل دەڭگەيٸنە قاراي قىزىل, سارى ايماقتارعا بٶلٸنگەن.
مينيستردٸڭ ايتۋىنشا, سەمەيدەگٸ №1 جەو, پاۆلودارداعى №2 جەو, شىمكەنتتەگٸ №3 جەو, ماەك-قازاتومٶنەركەسٸپ №1 جەو, قازاتومٶنەركەسٸپ №2 جەو, پەتروپاۆلداعى №2 جەو, جەزقازعان, ريددەر, تەككەلٸ, شاحتينسكدەگٸ جەو-لار بويىنشا قاۋٸپ بار.
وسى كەزدە مەجٸلٸس تٶراعاسى ەرلان قوشانوۆ سٶزگە ارالاستى.
"الماسادام مايدانۇلى, سٸزدەر جينالام دەگەنشە, قىس تٷسەدٸ. كەستە دايىن بولسا, سولاي دەپ ايتىڭىز. نەگە بٸزگە بٷكٸل كەستەنٸ بايانداپ جاتىرسىز? جالپى سۇراق دۇرىس قويىلىپ وتىر. پرەزيدەنت جىلۋ ەلەكتر ورتالىقتارىنا, قازاندىقتارعا, بارلىق نىسانعا ٶزٸ بارادى, جٶندەۋ جۇمىستارى باستالدى ما, جوق پا وعان قارامايدى. ال سٸزدەر كەستەنٸ ەندٸ عانا ەزٸرلەپ بٸتٸردٸڭٸزدەر", - دەپ تٷيٸندەدٸ سپيكەر.
ۆيدەو: Tengrinews.kz
