JOLPOL JÁNE JOLPUL
Astanadaǵy Qabanbai atyndaǵy dańǵyldyń áýejai jaqtan kele jatqanda «Aziia parkke» deiingi bóligi – «Ataman Annenkovtyń azap vagony».
Osy baǵyttaǵy eki joldyń biri avtobýs joly da, qalǵan mashinanyń bári bir joldyń boiymen ilbip otyrady. Osyndai intensivti trassada búkil mashina bitkenge bir jol ǵana berip qoiý – avtomobilistiń qanyn ishýdiń klassikalyq úlgisi.
Shynynda da bul jol júrgizýshi bitkendi tozaqqa úiretýdiń taptyrmas quralyna ainaldy. Óitkeni, oń jaqtaǵy avtobýs joly kóbine ashyq turady. Ash ishektei sozylǵan keptelistiń qoldan jasalyp turǵanyna kúiip ketesiń. Shydamnyń da shegi bar. Buryn jol boiyndaǵy baǵanalarda qazdai tizilip turǵan fotoapparattan qorqatyn júrgizýshiler qazir odan da qaimyqpaityn boldy. Sanaly túrde! Tózimi taýsylǵan júrgizýshiler sońǵy kezderi jol tártibin jii buza bastady. Bul túbi jaqsylyqqa aparmaidy.
Oń jaqtaǵy bos jatqan jol – jol boiynda qol kóterip turǵan sulý kelinshektei ózine tartady da turady. Kózdiń jaýy. Sodan bolar, altyn ýaqytynyń ár minýtyn baǵalap úirengender ashyq jatqan jolǵa túsip alyp ańyratýdy ádetke ainaldyryp alǵaly qash-shan?!
Bul jerde «Izdegenge – suraǵan» printsipi ádemi jumys istei bastaǵanyn baiqamaý múmkin emes. Eki-úsh apta boldy, Jolpoldyń qudaiy berip tur. Orta tusta ańdyp turǵan politsiia qyzmetkerleri «jol erejesin buzýshylardy» topyrlatyp toqtatyp, aiyppuldy burqyratqanda qudai saqtasyn! «Riza» bolasyń! «Kásibi sheberlikterine»!
Torǵa túsken torǵaidyń kúnin keshken júrgizýshilerde tańerteńsin esep joq. Kináli bolǵan jerde resmi aiyppul da, «barmaq basty, kóz qysty» aiyppul da salyna beretini – kezdeisoqtyq emes, zańdylyq. Gaishniktiń de qý tamaǵy bar ekenin júrgizýshiler jaqsy biletinin sol jolpol qyzmetkeriniń ózi de jaqsy biledi. Sondyqtan da oilaisyń: osynyń bári ádeii qoldan jasalǵan nárse emes pe?! Ras aitamyn, «Halyqtyń qaltasyn qaǵýdyń taǵy bir quraly» degennen basqa oi kelmeidi. Oibai-aý, Qudaidyń bizge bergen jeri bárimizge jetip artylatyn siiaqty edi ǵoi. Qudai taryltpaǵandy ne ǵyp Jolpol taryltyp tastaǵanyn?! «Etigiń tar bolsa, dúnieniń keńdiginen ne paida?» degen pálsápanyń naq ózi. Basqa eshteńe de emes. Amalsyz avtobýstyń jolymen kele jatyp, alystan «jolpolshylardy» kórgendegi júrgizýshiniń túrin kórseńiz. Kúlkiden ólesiz. Zańdastyrylǵan mashina toly jalǵyz jolǵa qalai kirip keterin bilmei jantalasqan júrgizýshiniń bul tirligi agoniiaǵa túsken Raspýtindi kóz aldyńa alyp keledi. Typyrlap qalǵan júrgizýshi jol apaty sitýatsiiasyn jasap jatqanyn bile tura, túk istei almai pushaiman bola qalatynyn kúnde kóz kórip júr.
Jaman aitpai jaqsy joq, bul bir bálege uryndyrmai tynbaidy. Órkenietti elderde kez kelgen nárse adamnyń qolaily ómir súrýi úshin jasalady. Bizde kerisinshe. Sonshama sorly bolýdy nege dál bizdiń mańdaiymyzǵa jaza beredi?! Kózge shyqqan súieldei osy súikimsiz problema tez arada sheshilý kerektigi dáleldeýdi kerek etpeidi.
Sondyqtan da tyǵyz ýaqytyńyzdyń toǵyz minýtyn túiini qiyn osy máselege bólýińizdi suraimyn, Áset Isekeshov myrza! Siz qozǵalsańyz, seń qozǵalady! Áitpese, jolpol jolpulyn aiyryp turǵany turǵan! Máńgilik!
Sharhan Qazyǵuldyń feisbýktaǵy jazbasynan
