Qazaqstannyń quqyq qorǵaý organdary sintetikalyq esirtki óndirisi men satýdan túsken 1,8 milliard teńgeden astam zańsyz kiristi zańdastyrdy degen kúdikke ilingen Qazaqstan azamatyn Grýziiadan ekstraditsiialady, dep habarlaidy ult.kz.
Bas prokýratýranyń málimetinshe, ekstraditsiia Bas prokýratýra, Ishki ister ministrliginiń Interpol qyzmetkerleri jáne Qazaqstannyń Grýziiadaǵy Elshiliginiń qoldaýymen júzege asyrylǵan. Kúdikti asa iri kólemde psihotroptyq zattardyń zańsyz ainalymymen ainalysqan jáne qylmystyq kiristerdi zańdastyrǵan uiymdasqan qylmystyq toptyń múshesi retinde jaýapqa tartylyp otyr.
Tergeý nusqasyna sáikes, ol Almaty oblysynda sintetikalyq esirtki óndirisin uiymdastyrýǵa qatysqan. Daiyndalǵan psihotroptyq zattar keiin Almaty qalasy men Almaty oblysynyń aýmaǵynda jasyryn túrde taratylǵan.
Tergep-tekserý barysynda qylmystyq toptan 10 kelige jýyq mefedron tárkilendi.
Quqyq qorǵaý organdarynyń dereginshe, qylmystyq top zańsyz qyzmetten 1,8 milliard teńgeden astam tabys tapqan. Bul qarajat túrli qarjylyq operatsiialar, onyń ishinde kriptoalmastyrǵyshtar arqyly zańdastyrylyp, 600 million teńgeden astam somaǵa jyljymaityn múlik, biznes nysandary men kólik quraldary satyp alynǵan. Atalǵan aktivterge memleket paidasyna tárkileý maqsatynda tyiym salyndy.
Qazirgi ýaqytta uiymdasqan qylmystyq toptyń birqatar múshesine qatysty is sotta qaralyp jatyr. Al kúdiktiniń ózi jáne toptyń ózge músheleri halyqaralyq izdeýge jariialanǵan bolatyn.
Biylǵy qańtarda kúdikti Grýziia aýmaǵynda ustalyp, Bas prokýratýranyń suraýy boiynsha Qazaqstanǵa ekstraditsiialandy.
Qazir ol tergeý izoliatoryna qamaldy. Zań boiynsha, ózine taǵylǵan aiyptar dáleldengen jaǵdaida, onyń múlki tárkilenip, 20 jylǵa deiin bas bostandyǵynan aiyrylýy múmkin.
