Astana áýejaiynda tekserýshi qyzmetkerlerge qol sómkesinde "bomba bary" týraly aitqan Aýǵanstannyń Qazaqstandaǵy burynǵy elshisi Mohammad Farýk Barakidiń sózi "orynsyz boldy", - dedi Qazaqstan syrtqy ister ministriniń orynbasary Muhtar Tileýberdi.
Mohammad Farýk Baraki 1 mamyr kúni Kabýlge ushatyn kezde tekserý pýnktinde keden qyzmetkeri odan sómkesinde ne bary týraly suraǵanynda "bomba bar" dep ázildep jaýap bergen. Astanada úkimet saǵatynan soń jýrnalister suraǵyna jaýap bergen Muhtar Tileýberdi arnaiy qyzmet ókilderi qujattary men zattaryn teksergenge deiin Barakidiń diplomat ekenin bilmegen, biraq Barakidiń isi "orynsyz bolǵanyn" aitty. Degenmen ol diplomatqa mundai sózi úshin ministrlik deńgeiinde shara qoldanylmaitynyn, máseleniń sol jerde jabylǵanyn aitty.
Diplomat "ázilinen" soń dereý ustalyp, áýejaiǵa kiretin esikter dereý jabylyp, oqiǵa ornyna arnaiy qyzmet ókilderi barǵan. Tekseristen soń diplomattyń eline ushýǵa ruqsat berilgen.
Astana áýejaiynyń baspasóz hatshysy Kamila Qasymbekova Azattyqqa diplomat "óreskel túrde ereje buzǵanyn" jáne ony "ázili úshin" jaýpkershilikten diplomatiialyq qol suǵylmaýshylyq quqyǵy ǵana qutqaryp qalǵanyn aitty.
