Jeksenbi, 23 qazanda Qytai kommýnistik partiiasynyń 20-sezi aiaqtaldy. Sezd nátijesinde Si Tszinpin bas hatshy qyzmetine qaita sailandy. Ol kompartiia hatshylyǵyna osymen úshinshi ret sailanyp otyr.
Sezd sonymen birge partiia ortalyq komitetiniń jańa quramyn bekitti. Tizimge saiasi biýronyń turaqty komitetiniń jeti múshesiniń tórteýi enbei qaldy. Arasynda premer-ministr Li Ketsian da bar. 22 qazanda Si Tszinpin sóilemei turyp Qytaidyń burynǵy basshysy Hý Tszintao zaldan shyǵarylǵan. Keibir sarapshylar Hý Tszintaonyń ustalýy múmkin ekenin boljaǵan. Resmi Pekinniń túsindirýinshe, "partiianyń burynǵy basshysy ózin nashar sezinip, kómekshileri zaldan shyǵýǵa kómektesken".
Eki saǵatqa sozylǵan baiandamasynda Si Tszinpin Qytaidyń 2035 jylǵa deiingi damý josparyna toqtaldy. Ol ekonomika, bilim salasyn damytý, ónerkásipti modernizatsiialaý, "jasyl" energetikaǵa kóshý máseleleri týraly aitty. Taivandy Qytaiǵa beibit túrde qosyp alý josparynyń oryndalýy barǵan saiyn qiyndasa da, sezde kompartiia Taivan táýelsizdigine qarsy turý jóninde sheshim qabyldady. Si Tszinpin baiandamasynda Qytai Taivandy beibit túrde qosyp alýǵa umtylady, alaida qajet jaǵdaida kúsh qoldanýǵa daiyn dedi.
