Kúndelikti qym-qýyt tirlikte asa baiqala bermese de, tapshylyǵyn turmys kótere almaityn, dereý orny bilinip qalatyn zattar bolady. Sonyń biri – kádimgi aina, shyny. Ainasyz búginde ainalany elestetý qiyn bolar. Shynynda da solai. Úidiń terezesinen bastap, shynynyń paidalanylmaityn jeri kemde-kem. Tipti, qazir qurylysta da shynynyń orny ózekti bolyp tur. Qostanai qalasyndaǵy «Steklotsentr-2008» jaýapkershiligi shekteýli seriktestigi on bes jyldan beri tutynýshylar qajetin tabýǵa kómektesip, kóńilden shyǵyp keledi. Jyl saiyn olardyń kórseter qyzmet túrleri de, taýardyń ár alýandyǵy da kóbeie túsken. Kompaniia tutynýshyǵa shyny túrleri men ony óńdep, formaǵa keltirip berýdiń túr-túrin usynady.
Ainanyń neshe túri, onyń ainalasyn árlendirý, jazý, oiýlaý sekildi turmysqa sándi buiymnyń barlyǵy «Steklotsentr-2008» kásipornynyń Qostanaidaǵy tsehynan shyǵyp jatyr. Onyń dúkeninen tutynýshy tek aina ǵana emes, turmysta qoldanylatyn shynydan jasalǵan talai buiymdy tabady, tańdaidy. Ústel, oryndyq, as úidiń qabyrǵasyn árleitin «aljapqysh», saǵat deisiz be, shynydan jasalyp syńǵyrlap turǵan talai dúniege tap bolasyz. Munyń barlyǵyn jasaý kásiporyn mamandary men basshylaryna Italiiadan aldyrylǵan qymbat jabdyqtyń arqasynda múmkin boldy. Kompiýterlendirilgen stanok belgilengen baǵdarlamamen áinektiń nemese ainanyń betine tyrnaq izindei artyq syzatsyz qalaǵan sýretti, oiýdy salyp, jazýdy shytynatpai jazyp beredi. Sondai-aq, osy stanoktardyń birimen monolitti shynyny syzatsyz qalaǵan kólemde, qalaǵan formada kesedi.
Óndirisi ozyq elderden úirengende ǵana kásiptiń qadamy júretinin izdengen kásipkerler jaqsy bilip qalǵan. Italiiadan ákelingen shyny kesetin, órnekteitin jabdyqtardyń kepildigi bar. Eger baǵdarlamany ózgertý nemese jańa materialdar kerek bolsa, kásiporyn mamandary italiialyq zaýyttyń Máskeýdegi ókildigine habarlasady.
– Mysaly, jylyna eki ret Máskeýdegi zaýyt ókildigine shyǵyp otyramyz. Óitkeni, aina men shynylardy órnektegende olardyń astyna qalyń aliýminii taqta qoiylady. Onyń ústińgi qabatyn jarty jylda bir ret ózgertip turý kerek. Osyǵan máskeýlikter kómekke keledi, – deidi «Steklotsentr-2008» kásipornynyń mamany Pavel Aksenov.
Turmys ta, qurylys ta shynysyz bolmaidy dedik. Sońǵy kezderi tripleks, iaǵni «shyńdalǵan» shynyǵa naryqta suranys kóp. Onyń mánisi de, sapasy da qansha baltalasań da shynynyń jaryqshaqtary ushpaityndyǵynda, qaýipsizdiginde. Tseh mamany osyndai shynynyń bir bóligin baltalap kórsetti. Mundai shyny túrin as úidiń qabyrǵasyn árleýge qoldanady, sonymen qatar avtobýstardyń terezesine de osyndai qaýipsiz shynylar salynady. Bul jaraqattyń bolýyn azaitýǵa yqpal etedi. Qurylysta qazir iri ǵimarattardyń esik, terezesin de «shyńdalǵan» shynydan salý talap etiledi. Ol kádimgi shynynyń birneshe betin arasyna arnaiy plenka salyp qabattap, eki saǵat joǵary temperatýrada «pisirip» jasalady. Mundai úlken suranysqa ie taýardy jasaý úshin «Steklotsentr-2008» kásipornyna taǵy da sheteldik jetildirilgen stanok kerek. Ony kásiporyn basshylyǵy «Damý-óndiris» baǵdarlamasy boiynsha alýǵa qajetti qujattar daiyndaý ústinde. Baǵasy 95 million teńge turatyn stanok Qostanaida tripleks shynysyn óndirýge múmkindik jasaityn bolady.
Jalpy, «Steklotsentr-2008» jaýapkershiligi shekteýli seriktestigi memlekettik baǵdarlamanyń arqasynda tutynýshy qajetin óteitin kásiporyn dárejesine kóterildi, naryqty baiytty. Shaǵyn jáne orta kásipkerlikti qoldaý jónindegi «Damý» qorynyń baǵdarlamasy boiynsha 49 million teńgeni jylyna 6 paiyzdyq ústememen alǵan bolatyn. Sonyń arqasynda ásem buiymdar óndirip, tutynýshylar kóńilinen shyǵyp, naryqta ózin senimdi sezine bildi. Endi olar kásiporyndy keńeitýdi josparlap otyr.
– Memlekettik baǵdarlamanyń qoldaýy bizdiń kásiporynnyń naryqqa kelýine tolyq múmkindik jasady. Átteń, Qazaqstanda shyny óndiretin óndiris joq. Biz shynyny Resei men Qyrǵyzstannan tasimyz. Qyrǵyzstanda nemis investorlary shyny zaýytyn salǵan, shynysynyń sapasy jaman emes. Biz óz shyny zaýytymyzdy salýdy armandaimyz, – deidi Pavel Aksenov.
Áý basta jalǵa alǵan kishkentai tsehta tereze jeldetkishine shyny kesýmen ainalysqan derbes kásiporyn óziniń jeke ǵimaraty bolýyn, úlken kásiporynǵa ainalýdy maqsat tutqan edi. Mine, qazir 150 adamǵa jumys berip otyrǵan, Astana, Kókshetaý, Petropavl qalalarynda filialdary bar iri kásiporynǵa ainaldy. Kásiporynnyń shyny shyǵarar ýaqyty da keler.
Názira JÁRIMBETOVA,
«Egemen Qazaqstan»
QOSTANAI
.jpeg)