Foto: ashyq derekkóz
Ishki ister ministriniń orynbasary Sanjar Ádilov qyzmettik salǵyrttyqqa jol bergen birqatar politsiia qyzmetkerlerine qatysty qylmystyq ister qozǵalǵanyn málimdedi, dep habarlaidy Ult.kz.
Memleket basshysy 20 qańtarda Shymkent qalasyndaǵy qaiǵyly oqiǵaǵa bailanysty jergilikti politsiianyń áreketine tekserý júrgizýdi tapsyrǵan bolatyn. Sebebi marqum boijetken ózine qatysty ańdý faktileri týraly aryzdanǵanymen, quqyq qorǵaý organdary tiisti shara qoldanbaǵan. Sonyń saldarynan qylmys qaiǵyly aiaqtaldy.
Prezidenttiń tapsyrmasynan keiin sol kúni jergilikti politsiia basshysy men onyń orynbasary qyzmetinen bosatyldy. Al 22 aqpanda Ishki ister ministriniń orynbasary Sanjar Ádilov salǵyrttyq tanytqan qatardaǵy politseilerge qatysty qylmystyq isterdiń tirkelgenin habarlady.
Eske salaiyq, 11 qańtar kúni keshki ýaqytta Shymkent qalasyndaǵy Tólemetov kóshesinde 21 jastaǵy Nurai Serikbai pyshaq jaraqattarynan qaza tapqan edi. Qaiǵyly jaǵdai beinebaqylaý kameralaryna túsip qalǵan. Kadrlardan qyzdyń qashyp qutylýǵa tyrysqany, shabýyldaýshyǵa qarsylyq kórsetkeni, alaida kúdiktiniń ony uryp-soǵyp, birneshe ret pyshaqtap, keiin oqiǵa ornynan qashyp ketkeni anyq kórinedi. Resmi emes málimetke sáikes, marqum 11 ret pyshaq jaraqatyn alǵan.
Atalǵan derek boiynsha Qylmystyq kodekstiń 99-babynyń 1-bóligi «Adam óltirý» boiynsha qylmystyq is qozǵaldy. Qylmys jasady degen kúdikpen 28 jastaǵy Sherhan Aimahan ustalyp, tergeý izoliatoryna qamaldy. Kúdikti shabýyldan keiin kóligimen qashyp ketkeni belgili boldy.
Oqi otyryńyz: Qyz alyp qashý «dástúr» emes, qylmys
