Shymkent qalasyndaǵy retsiz saýda men bazarlardy joiyp, zaman talabyna sai saýda oryndary men alyp dúkenderdiń qurylysyn qolǵa alýymyz kerek. Osyǵan sáikes qalanyń bas jospary boiynsha iri bazarlardyń bári qala syrtynda ornalasatyn bolady. Búgin bul týraly qaladaǵy birqatar áleýmettik nysandardy aralaý barysynda Ońtústik Qazaqstan oblysy ákimi Janseiit Túimebaev málim etti.
Óńir basshysy kútpegen jerden Rysqulov pen Dýlati kósheleriniń qiylysynda ornalasqan «Qazybek» ámbebap bazaryna aialdady. Bazar mańyndaǵy qujynaǵan halyq pen eshqandai sanitarlyq talaptarǵa jaýap bermeitin júiesiz saýda retterin kórgen ákim bazar jyl sońyna deiin qala syrtyna kóshiriletinin aitty. Sondai-aq Elbasynyń tapsyrmasyna sáikes Shymkentti iri megapoliske ainaldyrý boiynsha jańa jobalardyń qolǵa alynyp jatqanyna toqtaldy. Atalǵan bazardy qala syrtyna kóshirýdi jyl sońyna deiin sheshýdi qala basshylyǵyna tapsyrdy.
«Qazirgi talaptarǵa sáikes bul bazar qala syrtyna kóshiriletin bolady. Sondyqtan mundaǵy saýda jasap jatqan kásipkerler túsinistikpen qarap, bizge qoldaý bildirýi qajet. Saýdagerler dalada qalmaidy. Bárine zań talaptaryna sai zamanaýi úlgide salynyp jatqan Bozaryq shaǵyn aýdanyndaǵy saýda ortalyǵynan oryn beriletin bolady. Sondyqtan atalǵan bazardy jyl sońyna deiin jaýyp, kóshirýdi tapsyramyn», - dedi Janseiit Túimebaev.
Oblys ákiminiń bul talabyna sondaǵy satýshylar de qoldaý bildirip, kóshýge bailanysty eskertý sharalarynyń der kezinde júrip jatqandyǵyn jetkizdi.
«Jergilikti bilik qoiyp otyrǵan talaptar óte oryndy. Mynadai bazarda qystyń sýyǵy men jazdaǵy aptap ystyqta turyp saýda jasaý aitarlyqtai qiyndyqtar týdyrady. Sondyqtan biz kóshýge ázirmiz. Tek jańa bazardan oryn berseńizder bolǵany» dedi bir top satýshylar.
«Qazybek» ámbebap bazarynda jemis-jidek, kókónis pen kúndelikti tutynýǵa arnalǵan jáne qurylysqa qajetti taýarlar saýdalanady. Saýda ortalyǵynyń jalpy aýmaǵy 20 595 sharshy metrdi quraidy. Onyń ishinde 10 719 sharshy metri saýda alańyna jatady.
