Shymkentte áleýmettik jelide «Asko» laqap atymen tanymal bloger Asqat Balqybaev pen onyń eki sybailasy 4 jyl 6 aiǵa bas bostandyǵynan aiyryldy. Olar politsiia qyzmetkerlerinen áshkereleitin video jariialaimyz dep qorqytyp, aqsha bopsalaǵan, dep habarlaidy ult.kz.
Sot málimetinshe, Balqybaev Instagram, TikTok jáne YouTube jelilerinde memlekettik qyzmetshiler men politseilerdiń zańbuzýshylyqtaryn jariialap júrgen. Onyń Instagram paraqshasyna shamamen 146 myń adam jazylǵan.
Tergeý derekterine sáikes, sottalýshylar blogerdiń tanymaldylyǵyn paidalanyp, eki patrýldik politseiden aqsha talap etken. Olar qyzmettik kólikte otyrǵan politseilerdiń videosyn jariialaimyz dep qorqytyp, 200 myńnan 1 mln teńgege deiin aqsha suraǵan. Keiin Balqybaev deldal arqyly 500 myń teńge alǵan.
Budan bólek, úsheýi mas kúiinde kólik basqarǵan júrgizýshini ákimshilik jaýapkershilikten qutqarýǵa ýáde berip, odan 1 mln teńge alǵan. Alaida ýádelerin oryndamaǵan.
Sot úsheýin de adamdar tobynyń aldyn ala sóz bailasýymen jasalǵan bopsalaý qylmysy boiynsha kináli dep tanydy. Árqaisysy 4 jyl 6 aiǵa bas bostandyǵynan aiyryldy. Sonymen qatar bes jyl boiy media salasynda qyzmet atqarýǵa tyiym salyndy.
Sondai-aq eki jábirlenýshi politseidiń árqaisysyna moraldyq ziian úshin 1,5 mln teńgeden ótemaqy tóleý mindetteldi. Sot múlkin tárkileýdi qoldanbady.
Sot úkimi ázirge zańdy kúshine engen joq. Oǵan apelliatsiialyq tártippen shaǵym túsirýge bolady.
