Shymkent qalasynda vagondardyń aýdarylýynan 7 jolaýshy poiyzy 9 saǵatqa deiin jolda turyp qalǵan. Olarda 1400-ge jýyq adam bolǵan. Bul týraly QR Tótenshe jaǵdailar ministrliginiń resmi ókili Talǵat Ýáli habarlady.
Qazannyń 23-inen 24-ine qaraǵan túni Shymkentte 14 vagon joldan shyǵyp, aýdarylyp ketken bolatyn.
Saldarynan 7 jolaýshylar poiyzynyń qozǵalysy keshiktirildi, atap aitqanda:
1. Shymkent stantsiiasynda №34 «Aqtóbe – Almaty» jolaýshylar poiyzy 9 saǵatqa, №76 «Qyzylorda-Petropavl» poiyzy 7 saǵatqa keshikti.
2. Qorǵasyn stantsiiasynda № 56 «Qyzylorda-Kókshetaý» jolaýshylar poiyzy 5 saǵatqa keshikti.
3. Qyzylsai stantsiiasynda №23 «Almaty-Aqtóbe» jolaýshylar poiyzy 8 saǵatqa keshikti.
4. Mankent-2 stantsiiasynda №11 «Almaty – Shymkent» jolaýshylar poiyzy 5 saǵatqa, №85 «Nur-Sultan-Saryaǵash» poiyzy 1,5 saǵatqa keshikti.
5. Sastóbe stantsiiasynda № 33 «Almaty-Aqtóbe» jolaýshylar poiyzy 1 saǵatqa keshikti.
«Qozǵalysy keshiktirilgen poiyzdarda 1 393 jolaýshy bolǵan. Sonymen qatar, jergilikti atqarýshy organdar Shymkent qalasyna jolaýshylardy tasymaldaý úshin 5 shaǵyn avtobýs pen 2 avtobýs uiymdastyrdy», - dedi T.Ýáli.
Málim etilgendei, búgin saǵat 12.49-da atalmysh poiyzdar qozǵalysyn qaita jalǵastyrdy.
