Búgin Shymkent qalasynda «Týǵan jer-altyn besigim» atty oblystyq festival aiasynda Tóle bi aýdanynyń kúnderi ótýde, dep habarlaidy QazAqparat oblys ákiminiń baspasóz qyzmetine silteme jasap.
Memleket basshysynyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý men Ońtústik Qazaqstan oblysynyń 85 jyldyǵyna orai uiymdastyrylǵan festivalǵa 600-ge jýyq tólebilik ónerpaz qatysatyn onǵa jýyq is-shara uiymdastyrylady.
Shymkent qalasyndaǵy Ákimshilik iskerlik ortalyǵynda aýyl sharýashylyǵy eńbekkerleriniń dástúrli «Altyn kúz - 2017» jármeńkesinen bastaý alǵan sharaǵa Ońtústik Qazaqstan oblysynyń ákimi Janseiit Túimebaev qatysty.
Onda ákim, gobelen óneriniń qas sheberi Q.Tynybekovtyń 70 jyldyǵyna arnalǵan qylqalam, qolóner sheberleriniń kórmesin, aýyl sharýashylyq ónimderiniń jármeńkesin jáne «Tóle bi barysy» oblystyq ashyq týrnirin tamashalady.
Birneshe aiǵa sozylǵan «Týǵan jer - altyn besigim» atty oblystyq óner festivali Shymkentti dýmanǵa bólep jatqanyn aitqan ákim, festivaldi joǵary deńgeide uiymdastyrýǵa atsalysqan barsha azamattarǵa alǵysyn jetkizdi.
«Bul aýqymdy shara aýdan-qalalardyń mádenieti men rýhaniiatynyń kórinisinen bólek, áleýmettik-ekonomikalyq órkendeýin de aiǵaqtap otyr. Bul oblystyq is-sharamyz Elbasymyz Nursultan Ábishuly Nazarbaevtyń «Bolashaqqa baǵdar» rýhani jańǵyrý» baǵdarlamalyq maqalasyndaǵy «Týǵan jer» baǵytymen tikelei úndesip jatyr. «Kóktemniń bir kúni jylǵa azyq» degendi óz basynan ótkergen sharýanyń erte kóktemnen tynym tappai atqarǵan eńbeginiń rahatyn kóretin kezi - osy qońyr kúz. Tólebidiń aýylsharýashylyq salasynyń qyzmetkerleri jyldy jaqsy qorytyndylady. Buǵan dálel - búgingi jármeńkedegi sanyna sapasy sai azyq túliktiń barlyq túrin, oǵan degen halyqtyń qyzyǵýshylyǵy men jaqsy suranysyn kórip otyrmyz. Sondyqtan agrarlyq sektordaǵy jetistikterimizdi barsha oblys eńbekkerleriniń ortaq jeńisi dep baǵalaimyz», - dedi ákim.
Budan bólek, tólebilikter kelýshilerge dámi til úiirer Dihankól qymyzyn tegin taratyp, «Sirge móldireter» dástúri men «Marqa kóterý» balýandar jáne mergender saiysyn usyndy. Is-shara barysynda ulttyq-mádeni ortalyqtarynyń as mázirinen kórme, «Altybaqan» oiyn-saýyq otaýy aiasynda «Saqina salý» oiyndaryn uiymdastyrdy.
Dál osy kúni J.Shanin atyndaǵy oblystyq akademiialyq qazaq drama teatrynda «Jebe» halyqtyq drama ujymynyń Ádilbek Bekbosynulynyń «Tóle bidiń tóreligi» atty arnaiy qoiylymy qoiyldy. Týyndyda 1725 jylǵy oqiǵa kórinis taýyp, sipattaldy.
Sondai-aq «Otyrar» oblystyq ǵylymi-ámbebap kitaphanasynda aqyn, jýrnalist, ǵalym, baspager, Qazaqstan Jazýshylar odaǵynyń múshesi, filologiia ǵylymdarynyń kandidaty Temirǵali Kópbaev pen aýdandyq «Tóle bi týy» qoǵamdyq-saiasi gazeti redaktorynyń orynbasary, Orynbasar Súttibaevtyń oqyrmandarmen kezdesý keshi ótti. Shara sońy aýdandyq kórkem ónerpazdardyń Gala-kontsertine ulasatyn bolady.
