Shymkentte atraktsionnan qulaǵan jigit operator joq kezde biletsiz, ruqsatsyz shyǵyp ketken, dep habarlaidy QazAqparat.
«Jailaýkól» saiabaǵynyń direktory Bekbolat Tóleev qaiǵyly jaǵdaidyń qalai bolǵanyn baiandap berdi. Direktordyń sózinshe, bul jaǵdai keshe saǵat 20.00 shamasynda bolǵan.
«Ramazan aiy bolǵan soń barlyǵy aýyz ashady. Bizdiń operator da dál osy kezde kassadaǵy qyzmetkerge «bilet satpańyz» dep eskertip, aýzyn ashýǵa ketken. Sol sátte álgi jigit biikten qulaǵan. Ol jigit bizge buryn da jii kelip turatyn. Keshe ol kassadan bilet almai, operator kelgenshe joǵaryǵa kóterilgen. Qaýipsizdik beldikterin de ózi asyǵys taqqan. Biraq durys taqpaǵan. Bireýin taǵyp, bireýin taqpaǵanyn ázirge bilmei turmyz. Belbeý úzilmegen, tek asyǵyp durys taqpaǵan. Onyń qasynda tanys qyzy da bolǵan eken. Biraq ol da oqiǵanyń qalai bolǵanyn bilmei qalǵan. Sonymen biikke shyǵyp, túsip jatqan kezde 4-5 metr qalǵanda qulaǵan ǵoi», - dedi direktor.
Bekbolat Tóleev sondai-aq, 20 jastaǵy jigittiń biikke kóterilgennen keiin ruqsat etilmegen ádister jasaǵanyn aitady.
«Ol kóterilgennen keiin ary-beri shaiqatylǵan. Qatty shaiqatylǵany sonsha, jumsaq túshekke túspei, syrtyna, tipti qorshaýdyń janyna qulaǵan. Etpetinen túsken soń ishki aǵzalaryna da zaqym kelgen, basy jarylǵan. Tez arada alǵashqy kómek kórsettik, jeled járdem shaqyrttyq. Túnimen aýrýhanada júrip, ol jigittiń týystaryna moraldyq jáne materialdyq turǵyda kómek berdik. Anasy jylap júrdi. Aldaǵy ýaqytta onyń aiaqqa turyp ketýine atsalysamyz», - dedi saiabaq direktory.
Eske salaiyq, buǵan deiin Shymkenttegi atraktsiondardyń birinan jas jigit qulap, aýyr jaǵdaida aýrýhanaǵa túskenin habarlaǵan bolatynbyz. Qazirgi tańda dárigerler onyń jaǵdaiy aýyr ekenin aityp otyr.
