Shymkentte biyl 42 áleýmettik nysan paidalanýǵa berilgen. Sondai-aq, 3 nysan jeke menshik ieligine ótip, qala biýdjeti 134 million teńgege tolyqty. Qala ákimi Ǵabidolla Ábdirahymovtyń tóraǵalyǵymen ótken májiliste kommýnaldyq menshikti tiimdi paidalaný jaiy keńinen talqylandy, dep habarlaidy QazAqparat tilshisi.
Qalalyq ekonomika jáne qarjy bóliminiń basshysy Kenjebek Janbosynovtyń aitýynsha, búginde qala aýmaǵynda 280 kommýnaldyq zańdy nysan bar. Tek biyldyń ózinde 58 kommýnaldyq nysan memleket menshigi retinde qabyldanǵan.
Jiynda shahar basshysy bul saladaǵy jumystarǵa kóńili tolmaitynyn jetkizdi. Ásirese, sala mamandaryna Sairam, Tólebi, Túlkibas aýdandarynan qala aýmaǵyna jańadan qosylǵan eldi mekenderindegi aýyz sý júiesin memleket menshigine alýdy qatań túrde tapsyrdy.
«Sairam aýdanynan qosylǵan eldi mekender aýmaǵynda áli kúnge 34 nysan memlekettik tirkeýden ótpegen. Bul saladaǵy jumystarǵa bei-jailyq qareket tanytqany úshin jaýapty sala mamandaryna arnaiy shara kórilýi tiis», - dedi Ǵabidolla Rahmatollauly.
Sondai-aq, jiynda qala ákimi turǵyndardy kommýnaldyq qyzmetpen qamtyp otyrǵan monopolisterdiń qamsyz tirligin synǵa aldy.
«Qandai da bir qajettilikpen asfalt ornyn shuńqyrǵa ainaldyrǵan jaýapty mekemeler jol qaýipsizdigin saqtaý úshin jarqyraýyq shamdar qyzmetin paidalanyp, eskertý belgilerin ornatsyn jáne qazylǵan oryndy der kezinde qaita qalpyna keltiretindei bolsyn. Eger de atalmysh jumystar sapasyz oryndalatyn bolsa, qatań shara qoldanylady», - dedi jiyndy qorytyndylaǵan qala ákimi.
