Foto: Otyrar.kz
Shymkent qalasynda 21 jastaǵy stýdent qyzdyń ólimine qatysty kúdikti qolǵa tústi, dep habarlaidy Ult.kz. Bul aqparatty qala politsiia departamenti rastady.
Politsiianyń málimetinshe, jedel-izdestirý is-sharalary barysynda 28 jastaǵy qala turǵyny ustalyp, ýaqytsha ustaý izoliatoryna qamalǵan. Kúdiktini izdeýge politsiia departamentiniń jeke quramy tolyq jumyldyrylyp, qalaǵa kirip-shyǵatyn baǵyttarda baqylaý kúsheitilgen. Nátijesinde kúdikti Shymkent qalasynan shamamen 10 shaqyrym qashyqtyqtaǵy ashyq aýmaqtan tabylyp, ustalǵan.
Aldyn ala anyqtalǵandai, kúdikti marqum qyzdyń tanysy bolǵan. Qylmystyń naqty sebepteri men mán-jailaryn tergeý barysynda anyqtalmaq.
Qaiǵyly oqiǵa 11 qańtar kúni keshki ýaqytta Shymkent qalasyndaǵy Tólemetov pen Ótegenov kósheleriniń qiylysynda bolǵan. Pyshaq jaraqatyn alǵan 21 jastaǵy Nurai Serikbai oqiǵa ornynda kóz jumǵan. Áleýmettik jelilerde taraǵan beinejazbada qyzdyń qashyp qutylýǵa tyrysqany, alaida kúdiktiniń ony uryp-soǵyp, pyshaq suqqany kórinedi. Qylmystan keiin ol oqiǵa ornynan boi tasalaǵan.
Marqum Nurai Serikbai ata-anasymen birge qylmys bolǵan jerge jaqyn mańdaǵy kópqabatty úilerdiń birinde turǵan. Ol otbasyndaǵy kenje bala bolǵan, eki aǵasy bar. Jaqyndary qyzdyń máiitin máiithanadan alyp, Túrkistan oblysyndaǵy Tórtkúl aýylyna jerleýge alyp ketken.
Atalǵan derek boiynsha adam óltirý faktisimen qylmystyq is qozǵalyp, tergeý amaldary jalǵasyp jatyr.
