Biri bolashaq jaryn stýdenttik shaǵynda kezdestirse, endi biri kútpegen tanystyqtyń úlken mahabbatqa ulasaryn bilmegen. Qazaqstandyq tanymal tulǵalardyń arasynda alǵashqy kezdesýi erekshe oqiǵamen este qalǵan juptar az emes. Óner juldyzdarynyń ózderi bólisken estelikterine súiene otyryp, olardyń qalai tanysqanyn ult.kz tilshisi habarlaidy.
1. Meirambek Bespaev pen Marhabat Bespaeva
Tanymal ánshi Meirambek Bespaev pen jubaiy Marhabattyń tanystyǵy 2002 jyly Almatydaǵy Respýblika saraiynda bastalǵan.
Marhabattyń aitýynsha, ol qurbysynyń shaqyrýymen kontsertke barǵan. Sol kezde óner kórsetken “MýzART” tobynyń múshelerin tanymaǵan. Kontsert aiaqtalǵan soń qyzdar ánshilermen sýretke túsýge asyqqanda, Marhabat shette turyp qalǵan. Dál osy áreketi Meirambektiń nazaryn aýdarǵan. Ánshi kópshilikke qosylmaǵan qyzdy baiqap, qasyna shaqyrtqan.
“Ana qyz nege sýretke túsýge kelmei tur? Shaqyryńdar”, – degen ánshi.
Marhabat sýretke túsýge keliskennen keiin Meirambek oǵan tanysýdy usynǵan. Osylaisha kezdeisoq kezdesý keiin úlken sezimge ulasqan.
Jup 2004 jyly shańyraq kótergen. Marhabat bul oqiǵany “Habar” arnasyndaǵy “MýzART – 25 jyl” baǵdarlamasynda eske alǵan.
2. Táýekel Músilim men Mahabbat Túktibaeva
Akter Táýekel Músilim bolashaq jary Mahabbatpen jarnama túsiriliminde tanysqan. Alaida ol bastapqyda jumys ornynda eshkimmen romantikalyq qarym-qatynas bastamaýdy ustanym etken. Degenmen Mahabbatty kórgen sátte bul sheshimi ózgergen. Dinara Sátjanǵa bergen suhbatynda akter boijetkendi alǵash kórgende-aq erekshe áser alǵanyn aitqan.
Túsirilim aiaqtalǵan soń Táýekel uiymdastyrýshylardan qyzdyń telefon nómirin suraǵan. Biraq olar aldymen Mahabbattyń kelisimin alý kerektigin jetkizgen. Keiin akter qyzdyń áli ketpegenin bilip, ózi baryp tanysqan. Tipti ony úiine kólikpen jetkizip salýdy usynǵan.
Táýekeldiń aitýynsha, Mahabbattyń qarapaiymdylyǵy men uiań minezi birden unaǵan. Osy tanystyq keiin otbasylyq ómirge ulasqan.
3. Búrkit pen Aisha
Tanymal ánshi Búrkit bolashaq jary Aishamen óziniń týǵan kúninde tanysqan. Sol kúni meiramhanaǵa shaqyrǵan kýbalyq dosy qasyna shákirti Aishany ertip kelgen. Ánshi boijetkenge bir kórgennen ǵashyq bolǵan. Alaida Aishanyń júregin jaýlaý ońaiǵa soqpaǵan. Búrkit eki jyl boiy gúl men túrli syilyqtar, tipti noýtbýk pen teledidar tartý etken. Eki ret úilenýge usynys jasasa da, boijetken kelispegen.
“Eki jyl artynan júgirdim. Eki ret saqina syiladym. Eki ret bas tartty. "Shyqpasań, shyqpa" dep renjip, ózim shetelge ketip qaldym. Úshinshisinde bul kisi ózi keldi ǵoi”, – dep eske aldy ánshi.
Osylaisha eki jylǵa sozylǵan mahabbat hikaiasy aqyry nekege ulasqan. Keiin Búrkit “Otets” podkastynda 34 jasynda Aishamen otbasyn qurýǵa sheshim qabyldap, bastapqyda ata-anasyna aitpai neke qiǵanyn da baiandaǵan.
Búginde ekeýi qazaqstandyq shoý-biznestegi tanymal otbasylardyń biri.
4. Dastan Orazbekov pen Janat
“Orda” toby arqyly tanylǵan ánshi Dastan Orazbekov bolashaq jary Janatpen 2006 jyly ortaq tanystary arqyly kezdesken. Bul týraly óner iesi NTK telearnasynyń “Reviý” baǵdarlamasynda baiandaǵan.
Ánshiniń aitýynsha, qurbylary ekeýiniń tegi birdei ekenin baiqap, tanystyrýdy uiǵarǵan.
“Sizderdiń familiialaryńyz bir, tanysyp qoiyńyzdar”, – dep usynys jasaǵan qurbysy.
Alaida tanystyqtan keiin kóp uzamai Dastan jumys babymen Máskeýge ketip, ǵashyqtar qarym-qatynastaryn qashyqtan jalǵastyrýǵa májbúr bolǵan. Sol kezde ánshi súiiktisine degen sezimin jetkizý úshin “Tamshylar” ánin jazǵan.
“Sezimimdi bildirý úshin oǵan arnap osy ándi jazdym. Ánniń alǵashqy shýmaǵynda "Sensiń Jánnát" degen joldar bar. Shynymen de kóz aldymda ol maǵan jumaqtai sezildi”, – dep bólisken ánshi.
Osylaisha kezdeisoq tanystyq úlken mahabbatqa ulasyp, keiin ekeýi shańyraq kótergen. Al “Tamshylar” áni olardyń mahabbat tarihynyń erekshe esteligine ainalǵan.
5. Toqtar Serikov pen Beibit Seidýálieva
Tanymal ánshi Toqtar Serikov bolashaq jary Beibit Seidýálievany alǵash ret 2000 jyly “Nur-Muqasan” tobynyń kontsertinde kórgen. Sol kúni Ulyqpan Joldasovpen birge aldyńǵy qatarda otyrǵan ánshi sahnadaǵy boijetkenge birden nazar aýdarǵan.
“Keremet ánshi kelipti ǵoi, myna qyzdy taýyp alý kerek”, – dep oilaǵanyn eske aldy ol.
Arada bir apta ótkende Toqtar Beibitti taýyp, tanysqan. Bastapqyda oǵan aǵalyq qamqorlyq kórsetip, keiin ekeýi bir-birine baýyr basyp ketken.
Ánshi Beibitke alǵash syilaǵan syilyǵynyń alma bolǵanyn da jasyrmady.
“Men almany arnaiy satyp alyp, Beibittiń qolyna ustattym. Maǵan raqmet aityp, rizashylyǵyn bildirdi. Biraq almany qandai oimen berip turǵanymdy bilmeidi ǵoi”, – dedi ol.
Toqtar alǵashqy kezdesýleriniń birinde Beibitti Barbi qýyrshaǵyna uqsatqan. Alaida qýyrshaqtyń ataýyn shatastyryp, “Borbi” dep aityp qoiǵan. Beibit onyń qatesin túzetip, kúlip jibergen.
Ánshi osy sátte alǵash ret qyzdyń aldynda uialǵanyn eske aldy. Osylaisha kontsertte bastalǵan tanystyq keiin úlken mahabbatqa ulasyp, ekeýi shańyraq kótergen.
Biri kontsertte, endi biri túsirilim alańynda nemese oqý ornynda kezdesken. Keibiri alǵashqy sátten-aq bir-birine qyzyǵýshylyq tanytsa, endi biriniń mahabbaty ýaqyt óte qalyptasqan.
Bul jurtardyń oqiǵasy tanystyqtyń qai jerde jáne qalai bastalatynyn aldyn ala boljaý múmkin emes ekenin kórsetedi. Keide bir sýret, qarapaiym áńgime nemese kútpegen kezdesý adamnyń búkil ómirin ózgertýi múmkin.
