Shyǵys Qazaqstannyń Kúrshim aýdanynda ýrbanizatsiia úrdisterine qarsy sharalar qolǵa alynǵan. Shalǵaida jatqan shekaralyq aýdandarynyń biri sanalatyn Kúrshimde jergilikti halyqty turaqtandyrý jolynda jasalyp jatqan jumystar jaily aýdan ákimi Seisenǵazy Chýkaev ShQO Aimaqtyq kommýnikatsiialar qyzmetinde ótken baspasóz maslihatynda aityp berdi.
Seisenǵazy Chýkaevtyń aitýynsha, 2020 jylǵa deiin óńirlerdi damytý baǵdarlamasy boiynsha aýdannyń 8 eldi mekenin taza aýyz sýmen qamtamasyz etý úshin 2130 metr jerge sý qubyry tartylyp, 8 qudyq, 2 sý sorǵy ornatylǵan. Al Boran aýylynda, respýblikalyq biýdjet esebinen, uzyndyǵy 33,3 km sý qubyry jelisi salynyp jatyr. Qazirgi ýaqytta qurylysta 14 adam jumyspen qamtylǵan. Sý qubyry júiesi biyl paidalanýǵa berilip, 19 adam turaqty jumyspen qamtylady dep kútilýde. Jalpy 2017 jyly aýdan kóleminde qaýipsiz aýyz sýmen 21 eldi meken qamtylǵan.
Aýdan halqyn jumyspen qamtý máselesine de jiti mán berilgen. Kásipkerlerdi qoldaý kartasy aiasynda «GRK MLD» JShS-niń «Qarshyǵa» mys ken ornynda ken baiytý keshenin ashý josparlanyp otyr. 2018 -2024 jyldar aralyǵynda ken óndeý bastalsa, júzdegen jumys oryny ashylary anyq. Sonymen qatar, 2017 jyly jumysy toqtap qalǵan Buqtyrma balyq ósirý jáne ýyldyryq shashý sharýashylyǵy Aqmol Holding kompaniiasymen birlesip sharýashylyǵyn qaita jandandyrdy. Búgingi kúni kásiporynda 47 adam jumys isteidi.
Nátijeli jumyspen qamtýdy jáne jappai kásipkerlikti damytýdyń 2017 – 2021 jyldarǵa arnalǵan baǵdarlamasy aiasynda da jańa jumys oryndary ashylyp, memleketten kóterme aqy alyp sharýasyn dóńgelentip otyrǵandar jetkilikti.
- Shekaralyq eldi mekender máselesine beijai qaraýǵa bolmaidy. Bizdiń aýdan shalǵaida jatyr. Munda halyqty turaqtandyryp qalý mańyzdy másele. Árine, qalalyq jerge qonys aýdarǵysy keletinder bolady. Biz sol úshin aýylda turyp jatqan halyqqa barlyq jaǵdaidy jasaýymyz kerek, -dedi aýdan ákimi.
Jergilikti halyqty turaqtandyryp qalý máselesimen qatar, aýdanda basqa aimaqtardan kóship kelgen otbasylarmen halyq sanyn arttyrý da júzege asyrylýda. Máselen, ótken jyly Kúrshimge quramynda 76 adam bar 23 oralman otbasy jáne eńbek kúshi artyq óńirden 1 otbasy kóship kelgen. Olarǵa jolaqy sýbsidiiasy jáne jalǵa berý kommýnaldyq qyzmet tóleý shyǵyndary berilgen.
