QR Memlekettik qyzmet isteri jáne sybailas jemqorlyqqa qarsy is-qimyl agenttigi memlekettik qyzmet bedelin túsiretin áreketter sanatyna ádep buzýshylyqtardyń jeke quramyn engizbek.
Bul jaiynda búgin atalǵan agenttik tóraǵasynyń orynbasary Alik Shpekbaev málim etti, dep habarlaidy QazAqparat.
Senattyń Halyqaralyq qatynastar, qorǵanys jáne qaýipsizdik komitetinde ótken «QR-da sybailas jemqorlyqqa qarsy is-qimyl máseleleri boiynsha zańnamany jetildirý» taqyrybyndaǵy dóńgelek ústel barysynda negizgi baiandama jasaǵan Shpekbaevtyń aitýynsha, elimizde Ádep kodeksin buzǵan memlekettik qyzmetshilerge jaza jeńil. Máselen, olar qyzmettik kólikterdi jeke maqsatynda paidalansa, azamattarǵa jáne qyzmettesterine dórekilik tanytsa, kólikti mas kúiinde basqarsa nemese mas kúiinde qoǵamdyq oryndarda júrse eskertý alady ne qatań sógis alyp qutylady.
«Birden qatań sharalar qabyldaý qajet dep otyrǵanymyz joq. Degenmen, tym bolmaǵanda qyzmetine tolyq sáikes kelmeitindigin jariialap, úsh jyl boiy joǵary turǵan laýazymǵa joǵarylaý quqyǵynan aiyrýǵa nemese laýazymyn tómendetýge bolar edi. Ary ketkende, ádep normasyn óreskel buzǵany úshin jumystan shyǵarý qajet», - dedi ol.
Osy rette Halyqaralyq qatynastar, qorǵanys jáne qaýipsizdik komitetiniń tóraiymy Dariǵa Nazarbaeva agenttik basshysynyń orynbasarynan memlekettik qyzmetshiniń azamattarǵa dórekilik tanytqanyn qalai dáleldeýge bolatynyn surady.
«Bizde jazba júrgizýge tyiym salynbaǵan. Árkimniń de mundai múmkinshiligi bar. Mundai shaǵymdardy qaraǵan kezimizde kópshiligi jazyp alyp, sonymen faktini dáleldep jatady. Qazirdiń ózinde 62 fakti boiynsha jaýapqa tarttyq. Mundai faktilerge jol bergenderdiń basym bóligi memlekettik qyzmetshiler», - dep jaýap berdi Shpekbaev.
