Kembridj ýniversitetiniń baspasy qazaqtyń kórnekti ǵalymy, etnology, geografy, kartografy ári sýretshisi Shoqan Ýálihanovtiń tańdaýly shyǵarmalarynyń aǵylshyn tilindegi tuńǵysh jinaǵyn basyp shyǵardy. Kitap Qazaqstannyń Ulybritaniiadaǵy Elshiliginiń, Qostanai oblysy ákimdiginiń jáne Ulttyq aýdarma biýrosynyń qoldaýymen jaryq kórip otyr, dep habarlaidy "Ult aqparat".
Is-shara Ulybritaniianyń áigili Koroldik geografiialyq qoǵamynyń qabyrǵasynda ótti. Al onlain kórsetilimdi Qazaqstan, Ulybritaniia, Kanada, Birikken Arab Ámirlikteri, Perý, Polsha jáne Túrkiia elderinen 100-ge jýyq kórermen tamashalady.
Shoqan Ýálihanovtyń tarihi jáne ǵylymi eńbekteri óte qundy bolǵanyna qaramastan, aǵylshyntildi álemde áli kúnge deiin keńinen tanymal emes. Endi osy kitaptyń arqasynda bul olqylyqtyń orny tolady, deidi baspagerler.
Kembridj ýniversitetiniń basqarýshy direktory Djein Mannyń aitýynsha, Kembridj ýniversitetiniń baspasy tarih jáne antropologiia boiynsha kitaptardyń jetekshi baspageri bolyp sanalady. «Qazaqstandyq avtordyń eńbeginiń osy tektes kitaptar tizimine enýi baspa úii tarihyndaǵy mańyzdy oqiǵa. Biz búgin tusaýyn kesken ári jinaqqa engen kóptegen shyǵarmalar aǵylshyn tilinde sóileitin stýdentterge, ǵalymdarǵa jáne keń aýditoriiaǵa jol tartpaq», - dedi Djein Mann.
Kitapqa Shoqan Ýálihanov zerttegen Ortalyq Aziianyń geografiiasy, tarihy, etnologiiasy men ekonomikasy týraly ǵylymi málimetter engen. Shoqan Ýálihanov atyndaǵy Tarih jáne etnologiia institýty aýdarýǵa jiberilýi tiis materialdardy irikteý kezinde qazaqtar men óńirde meken etken basqa da ulttardyń tarihyn, salt-dástúrlerin, qazaq sot isin júrgizý júiesin sipattaityn maqalalarǵa jiti mán bergen. Sondai-aq ǵalymnyń demokratiialyq kózqarastaryna, onyń ishinde halyq úshin paidaly reformalar týraly aitqan pikirlerine erekshe nazar aýdarǵan.
Kitap redaktory, britaniialyq jazýshy Nik Fildingtyń pikirinshe, uly qazaq ǵalymynyń shyǵarmalaryn aǵylshyn tilinde basyp shyǵarý ideiasy 2017-jyly meniń Qazaqstanǵa jasaǵan saparlarymnyń birinde paida boldy. «Meni, ásirese, Shoqan Ýálihanovtyń Resei imperiiasynda kishi memlekettik qyzmetshi bola tura qazaqtyń dástúrli ómir saltyn buzǵysy kelgen bilikke qarsy sóz aita bilgendigi jáne óz halqyna laiyqty qurmetpen qaraýdy talap etkendigi erekshe tań qaldyrdy», - deidi Nik Filding.
