Foto: Polisia.kz
ShQO-da politseiler 26 jyl buryn jasalǵan asa aýyr qylmysty ashty, dep habarlaidy Ult.kz Polisia.kz aqparat portalyna silteme jasap.
Shyǵys Qazaqstan oblysynyń politsiia departamenti birneshe qarýly shabýyldar jasaǵany úshin ómir boiyna bas bostandyǵynan aiyrylǵan eki asa qaýipti qylmyskerdiń 1999 jyly jeltoqsanda Zaisanda jasalǵan qatigez adam óltirý men qaraqshylyq faktisine qatysy baryn anyqtady.
Oqiǵa bolǵannan keiin politsiia qyzmetkerleri jedel izdestirý is-sharalaryn júrgizdi. Alaida qylmyskerler qashyp úlgergen.
Arada jyldar ótkennen keiin politsiia men tergeý organdarynyń júieli, ári tiianaqty jumysynyń, sondai-aq oblystyq prokýratýranyń qoldaýy arqasynda qylmystyq oqiǵanyń barysy aiqyndalyp, kúdikti tulǵalar anyqtaldy.
Tergeý jumystary kórsetkendei, eki er adam iri olja tabý maqsatynda jergilikti turǵynnyń úiine basa-kóktep kirgen. Úiden baǵaly zat tappaǵan qaskóilerdiń biri 26 jastaǵy er adamdy asa qatigezdikpen pyshaqtap óltirgen. Sol sátte úide bolǵan 77 jastaǵy áiel adamdy qylmyskerler soqqyǵa jyǵyp, elektr symymen oryndyqqa bailap ketken. Olar oqiǵa ornynan 12 kalibrli qos uńǵyly ańshy myltyǵyn, "IJ-53M" pnevmatikalyq tapanshasyn jáne beinemagnitofondy urlap ketken.
Qazirgi ýaqytta eki aiyptalýshy da 2002 jyldyń jeltoqsanynda birqatar qaraqshylyq shabýyldar men adam óltirý faktileri boiynsha taǵaiyndalǵan ómir boiyna bas bostandyǵynan aiyrý jazasyn óteýde.
Shyǵys Qazaqstan oblysy politsiia departamenti "Adam óltirý", "Qaraqshylyq", "Densaýlyqqa qasaqana aýyr ziian keltirý" jáne "Qarýdy zańsyz iemdený" baptary boiynsha sotqa deiingi tergeýdi aiaqtady. Qylmystyq is sotqa joldandy.
Shyǵys Qazaqstan oblysynyń qylmystyq ister jónindegi mamandandyrylǵan aýdanaralyq sotynyń sheshimimen, atalǵan úkim boiynsha taǵaiyndalǵan jazalardy ishinara qosý arqyly, eki sottalýshynyń árqaisysyna qylmystar jiyntyǵy boiynsha múlki tárkilenip, tótenshe qaýipsizdik mekemesinde ómir boiyna bas bostandyǵynan aiyrý túrindegi túpkilikti jaza kesildi.
Politsiia qyzmetkerleriniń ádildikke degen tabandy eńbeginiń arqasynda 26 jyl burynǵy aýyr qylmystyń aqiqaty ashylyp, ádildik ornady.
