Tanymal aktrisa Dariǵa Badyqova jubaiy, akter Oljas Abaimen qarym-qatynasynyń qalai bastalǵanyn jáne ekeýiniń shańyraq kóterýge qalai sheshim qabyldaǵanyn aityp berdi. Óner iesi súiiktisiniń qalai sóz salǵanyn da jasyrmady, dep habarlaidy ult.kz.
Aktrisa Instagram paraqshasynda Oljas Abaimen ótken qudalyq rásiminen sýretter jariialap, kópshilikke osy kúnge deiin belgisiz bolyp kelgen estelikterimen bólisti.
Dariǵanyń aitýynsha, ekeýiniń arasynda alǵashynda mahabbat bolmaǵan. Olar tek jumys barysynda aralasyp, túsirilim alańynda birge júrgen. Tipti jii kelispei, sózge kelip qalatyn kezderi de bolypty.
«Jalpy biz kezdesken kúnnen mahabbat bolǵan joq! Tek jumys, túsirilim dep júrdik. Kúnde urysyp qalatynymyz. Ol da qaitpaidy, men de qaitpaimyn», – dep jazdy aktrisa.
Ýaqyt óte kele olardyń qarym-qatynasy ózgere bastaǵan. Degenmen ekeýi birden til tabysyp kete almaǵan. Aktrisa tipti bir-birin áleýmettik jelide buǵattap tastaǵan kezderi bolǵanyn jasyrmady.
«Oqyrmandarym jazyp jatyr, tipti bir-birińizden otpiska jasaǵan kezderińiz boldy ǵoi dep. Iá, bala siiaqty blokqa jiberetinbiz. Bizge mahabbat ońai kelmedi. Úilenemiz degen sheshimge birden kelmedi. Jaýapkershilikten qorqyp ta júrdik», – dedi ol.
Aktrisanyń sózinshe, bir kúni ekeýi ashyq sóilesip, qarym-qatynastaryn toqtatýǵa sheshim qabyldaǵan. Osylaisha árqaisysy óz jolymen ketken.
«Bir kúni otyryp sóilestik, boldy, osymen toqtataiyq dep. Eki jaqqa kettik. Qoi, qursyn, óz-ózimizdi qolǵa alaiyq dep. Syltaý izdep, qolǵa almai júrgen adamdar siiaqtymyz. Basqa da problemalar boldy. Sonymen ekeýimiz eki qalada júrdik», – dep eske aldy Dariǵa.
Alaida araqashyqtyq olardyń bir-birine degen sezimin óshirmegen. Dariǵanyń aitýynsha, Oljas Dýbaiǵa ushyp ketkenimen, kóp uzamai súiiktisin saǵynyp, qaita oralǵan.
«Baliden Dýbaiǵa ushtym, umytýǵa syltaý izdep. Ýje Dýbaidan qaitatyn ýaqyt boldy. Tańerteń soobshenie kelipti: "Dariǵa, qalaisyń? Qashan qaitasyń?" dep. "Jaýap bermedim". Eki saǵat ótken soń: "Seni ábden saǵyndym" dep jazypty. Maǵan da keregi sol edi, bilet alyp ushyp keldim», – dep jazdy aktrisa.
Osy oqiǵadan keiin ekeýi qaita tabysyp, bolashaqtaryna qatysty mańyzdy sheshim qabyldaǵan.
Dariǵa Badyqova súiiktisiniń ózine qalai sóz salǵanyn da aityp ótti. Onyń sózinshe, Oljas dástúrli túrde tizerlep otyryp usynys jasamaǵan. Onyń ornyna erekshe syilyq daiyndapty.
«Oljas salt-dástúrden attamai, bárin óz jónimen jasady. Kelgen kúni osy syrǵany salyp, úileneiik dedi. Mine, ótken tarih!» – dedi aktrisa.
Jariialanǵan sýretterdiń birinde Bulgari brendiniń syrǵasy kórsetilgen. Dariǵanyń aitýynsha, dál osy áshekei olardyń otbasyn qurý týraly sheshiminiń erekshe esteligine ainalǵan.
Aktrisa eki jaqtyń analary da balalarynyń qosylýyn qalaǵanyn jetkizdi.
«Mamalarymyz riza. Jalǵyz júrgenimizdi qalamaýshy edi. Ekeýi bas qossa eken dep», – dep jazdy ol.
Óner iesi Oljas ekeýiniń birge ótkizgen qiyndyqtary qarym-qatynastaryn nyǵaita túskenin atap ótti.
«Bir-birine ómirdi qalai súrý kerek ekenin úiretken, mahabbattyń qandai bolatynyn úiretken, qiyndyq bolsa birge bolýdy úiretken, bir-birine aýadai kerek adamdarǵa qiynnyń qiyny boldy», – dep jazdy aktrisa.
Sondai-aq ol ýaqyt óte kele ekeýiniń de qarym-qatynasqa degen kózqarasy ózgergenin jetkizdi.
«Jyldar óte, kúnder óte, emotsiiany aqylǵa sala bastadyq», – dedi Dariǵa Badyqova.
Aktrisa jazbasyn Oljas Abai ekeýiniń resmi túrde erli-zaiypty atanǵanyn habarlaýmen aiaqtady.
«Sonymen, basymyz bos emes erli-zaiypty jup boldyq», – dep qýanyshymen bólisti óner iesi.
Eske sala keteiik, 12 qazan kúni qos ǵashyqtyń úilený toiy ótip, jaqyndary qýanyshtaryna ortaqtasqan edi.
Dariǵa Badyqova kim?
Dariǵa Bolatqyzy Badyqova – qazaqstandyq tanymal aktrisa, ánshi jáne kinoprodiýser. Ol 1985 jyly 1 jeltoqsanda Jambyl oblysynyń Moiynqum aýylynda dúniege kelgen. Bolashaq aktrisa Temirbek Júrgenov atyndaǵy Qazaq ulttyq óner akademiiasynda «Mýzykalyq drama jáne rejissýra» mamandyǵy boiynsha bilim alǵan. Óner jolyn teatr sahnasynan bastap, rejisser Bolat Atabaevtyń «Aqsarai» mýzykalyq teatrynda eńbek etken. Teatrda Ǵabit Músirepovtiń «Qyz Jibek» qoiylymyndaǵy Qamqa beinesin somdaǵan. Keiin kino jáne telehikaialarǵa túsip, kórermenge keńinen tanyla bastady. Ol «Ǵashyq júrek», «Traktorshynyń mahabbaty» jáne «Abailańyz, siyr!» jobalaryna qatysqan. Aktrisaǵa erekshe tanymaldylyq ákelgen týyndy – «Kelinjan» telehikaiasy. Bul serialda ol Aisara esimdi keiipkerdi somdap, kópshiliktiń yqylasyna bólendi. Keiin «Qazaqsha biznes» filmder seriiasyna da tústi.
2023 jyly «Taptym-aý seni» romantikalyq komediiasy arqyly ózin kinoprodiýser retinde tanytty. Filmde basty rólderdiń birin akter Oljas Abaimen birge somdady. 2024 jyly aqpanda NTK telearnasy atalǵan filmniń kassalyq tabysy 1 milliard 850 million teńgege jetkenin habarlady. Keiin aktrisa «Taptym-aý seni» filminiń jalǵasyn túsirip, prodiýserlik qyzmetin jalǵastyrdy. Dariǵa Badyqova búginde akterlik óner men kino óndirisin qatar alyp júrgen qazaqstandyq óner ieleriniń biri.
