Shyǵys Qazaqstan oblysy Ridder qalasynda Úlbi ózeniniń mańaiyndaǵy Serjiha taýynda qar kóshkini basyp qalǵan týristiń ólimin tergeý úshin komissiia quryldy, dep habarlaidy "Ult aqparat".
ShQO tótenshe jaǵdailar departamenti baspasóz qyzmetiniń málimetinshe, 6 týrist shańǵy tebý úshin Ridderge Óskemennen kelgen.
Taýdan syrǵanap júrgende kenet kóshkin júrip, olardyń birin basyp qaldy.
Dereý kómekke TJD jedel qutqarý jasaǵynyń qutqarýshylar toby Evrokopter-145 tikushaǵymen shyqty.
Quramynda 5 adam bar ekinshi top jol talǵamaityn kólikpen Óskemennen jol tartqan. Oǵan qosa Ridder qalasynan qutqarýshylar men 4 volonter jumyldyryldy.
Alaida tikushaq kúnniń bultty bolýy men aqtútek boranǵa bailanysty qonýǵa májbúr bolǵan.
Osy ýaqytta saiahatshylar bailanysqa shyǵyp qar astynda qalǵan 1979 jylǵy er adamnyń denesin tapqandaryn aitty.
Saiahatshylar turǵan oryndarynyń naqty koordinattaryn berip, ol jerge qutqarýshylar men volonterlar qarda júretin tehnikamen jetti.
«11 aqpanda 8 volonter, 2 qutqarýshy jáne 1 kriminaldyq politsiia qyzmetkerinen turatyn top qaza bolǵan adamnyń denesin túsirý úshin taýǵa ketti. Qalyń qar men biik taýdy eńsergen olar 35 shaqyrymdy artqa tastaǵan. Saǵat 15:10-da marqumnyń denesi túsirildi. Týristtiń ólimin tergeý úshin komissiia qurylǵan» dep habarlady vedomstvo ókilderi.
Osy rette qutqarýshylar óńir turǵyndaryna qar kóshkini qaýpi joǵary taýly aimaqtarǵa barmaýǵa keńes beredi.
