Byltyr Ádilet ministrligi shetelge shyǵarylǵan 530 mln dollar elge qaitarylýyna sebepker bolǵan. Vitse-ministri Azamat Ámirǵaliev vedomstvonyń keńeitilgen alqa májilisinde osyndai aqparat aitty, dep habarlaidy QazAqparat.
«460 mln dollardan astam somaǵa memleket múddesi qorǵalyp, eki daý boiynsha 530 mln dollar elge qaitaryldy», - dedi vitse-ministr.
Aitýynsha, Ádilet ministrligi tarapynan avtorlyq quqyqpen qorǵalatyn týyndylarǵa 8 myńnan astam kýálik, al ónerkásiptik menshik obektilerine 12 myńnan astam qorǵaý qujaty berilgen.
«2021 jylǵa arnalǵan respýblikalyq biýdjetten ministrlikke 53 milliard teńgeden astam qarjy bólinip, ol tolyǵymen igerildi», - dep túiindedi Azamat Ámirǵaliev.
Atalmysh jiynda sot oryndaýshylardyń óndirisinde jalpy kólemi 9 trln teńgeden asatyn 6 mln 760 642 qujat bar ekeni aityldy.
«Sot oryndaýshylardyń óndirisinde jalpy kólemi 9 trln teńgeden asatyn 6 mln 760 642 qujat bar. Bul 2020 jylmen salystyrǵanda 30% kóp. Shamamen 300 mlrd teńge bolatyn 2 mln 349 166 qujat tolyq oryndaldy. Bul – óndiristegi qujattardyń 74%-y», - deidi Ádilet ministriniń orynbasary Azamat Ámirǵaliev.
Eske salsaq, Prezidenttiń qatysýymen jaqynda ótken Úkimet otyrysynda eki aidyń ishinde Qazaqstannan shetelge zańsyz shyǵarylǵan qarjyny qaitarý jóninde usynys ázirleý boiynsha tapsyrma berilgen bolatyn.
