QR Parlamenti Májilisi «Eýraziialyq ekonomikalyq odaqqa múshe memleketterdiń eńbekshilerin zeinetaqymen qamsyzdandyrý týraly kelisimdi ratifikatsiialaý týraly» QR Zańyn maquldady, dep habarlaidy QazAqparat.
«Eýraziialyq ekonomikalyq odaq týraly shartta zeinetaqymen qamsyzdandyrý máselesin retteý maqsatynda jeke halyqaralyq shart ázirleý kózdelgen bolatyn. Osyǵan bailanysty tiisti kelisim ázirlenip, 2019 jyldyń 20 jeltoqsanynda Memleket basshylary qol qoidy. Atalǵan kelisimniń negizgi maqsaty - jumysqa ornalastyrýshy memleket óz azamattaryna taraityn jaǵdailarda jáne tártippen eńbekshilerdiń zeinetaqy quqyqtaryn qalyptastyrý, saqtaý jáne iske asyrý, eńbekshilerdiń zeinetaqylaryn taǵaiyndaýǵa jáne eksporttaýǵa bailanysty máselelerdi sheshý, sondai-aq múshe memleketter arasynda zeinetaqymen qamsyzdandyrý salasyndaǵy yntymaqtastyqty nyǵaitý», - dedi atalǵan másele boiynsha baiandama jasaǵan QR Eńbek jáne halyqty áleýmettik qorǵaý ministri Birjan Nurymbetov.
Onyń atap ótýinshe, búginde EAEO-ǵa múshe memleketterde ártúrli zeinetaqy júiesi qalyptasqan. Mysaly, Belarýsta jinaqtaýshy zeinetaqy júiesi joq. Al basqa elderde jinaqtaýshy júieleri ártúrli. Zeinetaqy júielerin qarjylandyrý jáne zeinetaqy qarajatyn bólý tásilderinde de aiyrmashylyqtar bar. Budan basqa zeinetaqy júieleri qurylymdyq jaǵynan, iaǵni zeinetkerlik jasy, mólsheri, eńbek ótili jáne basqa da parametrler boiynsha erekshelenedi.
«Qazirgi ýaqytta turaqty turatyn sheteldik azamattar úshin zeinetaqymen qamsyzdandyrý máselesi rettelgen. Al jumys maqsatynda ýaqytsha kelgen eńbekshiler úshin bul másele rettelmegen kúide qalyp otyr. Sondyqtan atalǵan kelisimniń kúshine enýi eńbekshilerdiń zeinetaqy salasyndaǵy máselelerin retteýge múmkindik beredi. Atap aitqanda jumysqa ornalastyrýshy memlekettiń azamattary men eńbekshilerdiń teń quqyqtaryn qamtamasyz etiledi. Ár memleket óz aýmaǵynda jumys ótili kezeńderi úshin zeinetaqy tóleitin bolady. Árbir múshe memleket zeinetaqy alý quqyǵyn aiqyndap, onyń mólsherin óziniń ulttyq zańnamasyna sáikes esepteidi», - dedi ministr.
Onyń aitýynsha, kelisim aiasynda Qazaqstan tarapynan eńbekshi kóship-qonýshylarǵa ulttyq zańnamada belgilegen tártippen tek jinaqtaýshy zeinetaqy júiesinen zeinetaqy tólemderi kózdeledi.
«Kelisimdi iske asyrý jónindegi quzyretti organ retinde bizdiń tarapymyzdan Biryńǵai jinaqtaýshy zeinetaqy qory belgilenedi», - dedi Birjan Nurymbetov.
