Foto: olympic.kz
Mihail Shaidorovqa Almatydan quny 120 million teńge bolatyn páter syiǵa tartylmaq, dep habarlaidy Ult.kz.
Qala ákimdigi jariialaǵan memlekettik satyp alý qujattaryna sáikes, baspana Almatynyń ortalyq bóliginen berilýi tiis. Sonymen qatar, páter 2025 jyldan erte paidalanýǵa berilmegen jańa turǵyn úi kesheninen tańdalýy qajet.
Qujatta turǵyn úige qoiylatyn naqty talaptar da kórsetilgen: aýmaǵy 110–120,5 sharshy metr aralyǵynda, keminde úsh bólmeli bolýy shart.
Satyp alý jumystaryn Almaty qalasynyń Kommýnaldyq infraqurylym jáne turǵyn úi inspektsiiasy basqarmasy júrgizip jatyr. Ákimdik ókilderi bul qadam sportshynyń halyqaralyq arenadaǵy tarihi jetistigine kórsetilgen qurmet ekenin atap ótti.
Eske salaiyq, Shaidorov 2026 jylǵy qysqy Olimpiadada Qazaqstan qorjynyna altyn medal salyp, el sporty tarihynda erekshe nátije kórsetti. Buǵan deiin ol memleketten 250 myń AQSh dollary kóleminde syiaqy alǵan.
Sondai-aq chempionǵa páter, avtokólik jáne aqshalai sertifikat tabystalǵan. Al Dimash Qudaibergen men birqatar kásipkerler sportshyǵa kólik syilaǵan.
