QR Básekelestikti qorǵaý jáne damytý agenttiginiń tóraǵasy Serik Jumanǵarin áleýmettik mańyzy basym taýar men jetekshi qýat kózderin mamandandyrylǵan elektrondy alańda satýdyń táýekelderi kóp ekenin málim etti, dep habarlaidy QazAqparat.
Agenttik tóraǵasy Facebook-tegi paraqshasynda jyl basynda suiytylǵan gaz baǵasy qalai yryq bermei ketkenin túsindirýge tyrysty.
«Suiytylǵan munai gazynyń saýdasy mamandandyrylǵan elektrondyq alańda júrdi. Energetika ministrligi suiytylǵan gaz saýdasynyń jekelegen qaǵidalaryn ázirledi. Bul rette otyn-energetika kesheniniń basqa da taýarlary, mysaly, benzin, dizel otyny, aviakerosin jáne kómir birjalyq taýarlar tizbesine engizildi.
Osy taýar pozitsiialary boiynsha birjalyq saýda-sattyqty aldyn ala ótkizý úshin QR Básekelestikti qorǵaý jáne damytý agenttiginiń janynan memlekettik organdar, naryq sýbektileri jáne infraqurylymdyq uiymdar ókilderinen turatyn birjalyq komitet, konsýltativtik-keńesshi organ quryldy», - dep eske alady agenttik basshysy.
Serik Jumanǵarinniń aitýynsha, suiytylǵan gaz arnaiy elektrondyq saýda alańynda satylǵandyqtan, ol kúrt qymbattaǵan kezde saýdany ýaqytsha toqtaty turý múmkin bolmaǵan. Óitkeni Energetika ministrligi arnaiy elektrondy saýda alańynyń erejesin ázirlegen kezde mundai tetiktiń qajettigin eskermegen.
«Birjalyq taýarlar saýdasynyń sektsiialyq erejesiniń basty ereksheliginiń biri – birjalyq komitet qolaisyz syrtqy jáne ishki jaǵdailarda saýda-sattyqty toqtata turýǵa quqyly.
Mysaly, byltyr ekinshi toqsanda munai óńdeý zaýytynyn jumysyn toqtatý saldarynan otyn tapshylyǵy paida bolǵan kezde munai ónimderiniń saýdasy 2 aiǵa ýaqytsha toqtatyldy. Maýsym aiynda kómirdiń birjalyq saýda-sattyǵy tártipke sai ótpegenine bailanysty ýaqytsha toqtatylyp, shilde aiynda qaita bastaldy.
Sondai-aq saýda sessiiasynda baǵanyń ózgerýiniń yqtimal dálizin + / - 2% deńgeiinde bekitý týraly sheshim qabyldandy. Bul saýda-sattyqta baǵanyń ósýine jol bermeýge múmkindik berdi», - deidi agenttik tóraǵasy.
Al Energetika ministrligi ázirlegen suiytylǵan gazdy satatyn elektrondy saýda alańynyń jumys erejesinde mundai tetikter bolmaǵan.
«Suiytylǵan gazdy satý erejeleriniń birjalyq saýdadan keibir aiyrmashylyqtary boldy. Mysaly, baǵanyń ózgerý dálizi + / -10% aralyǵynda aýytqydy.
Onyń ústine baǵa shekten tys ósken jaǵdaida saýda-sattyqty toqtata turý quqyǵy siiaqty quraldar bolǵan joq.
Mamandandyrylǵan saýda alańynyń barlyq kemshilikteri naryq qatysýshylarynyń narazylyǵyna ákeldi. Agenttik Energetika ministrligine suiytylǵan munai gazyn satý erejelerin ózgertý boiynsha usynystar paketin jiberdi. Agenttik usynǵan túzetýler jeltoqsan aiynda, saýda-sattyqtaǵy baǵa jyldyń basymen salystyrǵanda 2 ese óske kezde baryp qabyldandy.
Tutastai alǵanda, qandai da bir taýar úshin jekelegen mamandandyrylǵan saýda alańdaryn qurýdyń orynsyzdyǵyn agenttik pen Energetika ministrligi birjalyq saýdany damytý máseleleri jónindegi zań jobasyn ázirleý barysynda eskerdi», - dep túsindirdi Serik Jumanǵarin.
