Memleket basshysynyń tapsyrmasyna sáikes, 2029 jyldyń sońyna deiin elimizdiń barlyq óńirlerinde áleýmettik, kólik jáne injenerlik infraqurylym jobalaryn júzege asyrýǵa Ulttyq qordan shamamen 6,5 trln teńge baǵyttalady. Bul týraly Premer-ministrdiń birinshi orynbasary Nurlybek Nálibaev aitty, dep habarlaidy ult.kz.
Úkimet úiinde Memleket basshysynyń «Jańa tarihi kezeńdegi Qazaqstannyń ózekti mindetteri» atty Joldaýynda berilgen mindetter aiasynda ekonomikanyń naqty sektoryn damytý máseleleri týraly baspasóz konferentsiiasy ótýde. Onda birinshi vitse-premer bastaǵan salalyq ministrler BAQ ókilderiniń suraqtaryna jaýap berýde.
«Prezidentimiz Qasym-Jomart Kemeluly Toqaevtyń basshylyǵymen Qazaqstan damýdyń jańa tarihi kezeńine qadam basyp otyr. Ózderińizge málim, elimiz aýqymdy saiasi reformalardy tabysty júzege asyrdy. Onyń aiasynda halqymyzdyń ál-aýqatyn arttyrýǵa baǵyttalǵan asa mańyzdy bastamalar qolǵa alyndy. Memleket basshymyz halyqqa Joldaýynda ekonomikamyzdyń ornyqty damýy men eldiń turmys sapasyn odan ári jaqsartýǵa tikelei yqpal etetin mańyzdy maqsat-mindetterdi aiqyndap berdi.
Osy oraida Prezidentimiz 2027 jyldy Jalpyulttyq aýqymdy qurylys jyly dep jariialady. Memleket basshysynyń tapsyrmasyna sáikes, 2029 jyldyń sońyna deiin elimizdiń barlyq óńirlerinde áleýmettik, kólik jáne injenerlik infraqurylym jobalaryn júzege asyrýǵa Ulttyq qordan shamamen 6,5 trln teńge baǵyttalady. Bul jumystar bastalyp ta ketti. Qurylǵan Infraqurylymdy damytý qory aiasynda jalpy somasy 1,5 trln teńgeni quraityn 262 joba maquldandy. Birinshi kezekte qomaqty qarajat áleýmettik infraqurylymdy damytýǵa baǵyttalýda», — dedi Premer-ministrdiń birinshi orynbasary.
Atap aitqanda:
- Densaýlyq saqtaý salasynda – jalpy quny 344 mlrd teńgeni quraityn 41 joba júzege asyrylady. Bul qarajatqa jańa aýrýhanalar, emhanalar, perinataldyq ortalyqtar men perzenthanalar salynady.
- Mádeniet, týrizm jáne sport salalaryna 266 mlrd teńge baǵyttalyp, 23 nysan salynady. Olardyń qatarynda sport keshenderi, mádeniet sarailary, teatrlar jáne basqa da áleýmettik mańyzdy nysandar boi kóteredi.
- Bilim berý salasynda mektepter men kópfýnktsionaldy keshenderdiń qurylysyn qosa alǵanda 101 mlrd teńgege 28 joba júzege asyrylady.
- Kólik infraqurylymyn damytýǵa 369 mlrd teńge qarastyrylǵan. Bul qarajatqa birqatar kúre joldar qaita jańǵyrtýdan ótedi, jańa avtomobil joldary, kópirler salynyp, 48 joba júzege asyrylady.
- Sýmen jabdyqtaý jáne sý burý júielerin damytýǵa – 284 mlrd teńge baǵyttalyp, 55 nysan qamtylady. Olardyń qatarynda magistraldyq sý qubyrlary, tazartý qurylystary, qorǵanys bógetteri men sý bógetteri bar.
- Jylýmen jáne gazben jabdyqtaý júielerin damytý boiynsha 67 jobany júzege asyrýǵa 136 mlrd teńge qaralǵan.
«Bul qaǵaz betindegi ǵana jospar emes. Osy 122 jobany júzege asyrýǵa qazirdiń ózinde naqty 497 mlrd teńge qarjy bólindi. Infraqurylymdy jańǵyrtýǵa baǵyttalatyn 6,5 trln teńgeniń barlyǵy Úkimettiń qatań baqylaýynda bolatynyn erekshe atap ótkim keledi», — dedi Nurlybek Nálibaev.
