Sport jáne dene shynyqtyrý isteri komitetiniń tóraǵasy Serik Sápiev el sportyndaǵy sońǵy jańalyqtarǵa pikir bildirdi, dep habarlaidy QazAqparat.
«Búgin bul jerge jaǵymdy sebeppen jinalyp otyrmyz. Jansaia Ábdimálikti osy jetistigimen quttyqtaimyn jáne qurmetimdi bildirgim keledi. Qazaqstan sportyndaǵy sońǵy jańalyqtar biz úshin jaǵymdy bolǵanyn aitqym keledi. Bokstan ótken Aziia chempionatynan bastasaq, jalpykomandalyq esepte Qazaqstan quramasy birinshi orynǵa ie boldy. Áielder quramasy 8 altyn medal jeńip aldy. Ókinishke qarai, erler quramasynyń nátijesi sonshalyqty tabysty bolǵan joq. Biraq laiyqty sheberlik pen sapa kórsetti deýge bolady», - dedi komitet basshysy.
Serik Sápiev «Rolan Garros» týrnirinde Qazaqstannyń atynan óner kórsetip jatqan tennisshilerdiń jetistigine de toqtaldy.
«Elena Rybakina Qazaqstan tarihynda alǵash ret álemniń burynǵy úzdik raketkasy Serena Ýiliamsty jeńdi. Andrei Golýbev pen Aleksandr Býblik te atalǵan týrnirdiń shirek finalyna ótip otyr», - dedi ol ortalyq kommýnikatsiialar qyzmetinde ótken brifingide.
Komitet basshysy hokkei quramasynyń toptyq kezeńniń syn saǵatynda múmkindikti qoldan jiberip alǵanyn da eske saldy.
«Hokkeishi jigitterimiz Álem chempionatynyń plei-off kezeńine bir attam jerden qaitqanyn bilesizder. Degenmen, bul da úlken jetistik. Sońǵy jańalyq - dziýdoshy Ǵusman Qyrǵyzbaev Álem chempionatynda kúmis medal jeńip aldy. Barlyq sportshylarymyzdy quttyqtaimyn. Árine, Jansaia Ábdimáliktiń jeńisi erekshe! Siz erler arasynda halyqaralyq grossmeister boldyńyz. Alda budan da úlken jetistikterge jetip, elimizdiń imidji úshin úlken nátijelerge jetýińizge tilektespin», - dedi Serik Sápiev.
