Senatta balalardy qorlaýdan qorǵaý úshin qosymsha sharalar qabyldaý usynyldy. Depýtat Rysqali Ábdikerov óziniń depýtattyq saýalynda kóńil kónshitpeitin statistikany málim etti, dep habarlaidy QazAqparat.
Dúniejúzilik densaýlyq saqtaý uiymynyń derekteri boiynsha, sońǵy 5 jylda Qazaqstan óz-ózine qol jumsaý deńgeii boiynsha, onyń ishinde 15-17 jas aralyǵyndaǵy topta álem elderiniń ondyǵyna kiredi.
«Ǵalymdar men sarapshylardyń sońǵy zertteý qorytyndylaryna qaraǵanda, jasóspirimderdiń 17 paiyzy mektepte aiyna bir nemese birneshe ret qysymǵa ushyraidy eken. Úiden tys jerde zábir kórip, ony ata-anasynan, muǵaliminen jasyryp, óz problemasymen jeke qalǵan bala aýyr psihologiialyq daǵdarysqa ushyrap, strestik jaǵdaidy bastan keshedi jáne onyń sońy orny tolmas jaǵdailarǵa soqtyryp júr. Sýitsidialdyq minez-qulyqtyń etiologiiasynda jalpy paidalanýdaǵy telekommýnikatsiialyq-aqparattyq júielerde ózine-ózi qol jumsaýdy nasihattap, balalardy sýitsidke itermeleý aqparattarynyń tyiylmai ornalasýynyń barǵan saiyn negizgi rol oinap otyrǵany alańdatady»,- dedi deýptat Úkimet basshysynyń orynbasary Eraly Toǵjanovtyń atyna joldaǵan saýalynda.
Rysqali Ábdikerov Qasym-Jomart Toqaev 2022 jyldy Qazaqstanda balalar jyly dep jariialaǵanyn atap ótti. Óz kezeginde áńgime merekelik is-sharalar uiymdastyrýda emes, eń aldymen, densaýlyq saqtaý, bilim berý jáne áleýmettik qamsyzdandyrý salasyndaǵy ýákiletti organdardyń balany qorǵaýǵa baǵyttalǵan naqty sharalary týraly bolýy tiis.
Depýtat qazir mektepterde psihologtardyń nátijeli jumys isteýine jaǵdai jasaý, balalardyń mazasyzdaný deńgeiin, sýitsidke beiimdiliginiń alǵashqy belgilerin anyqtaýǵa jáne der kezinde sharalar qabyldaýǵa baǵyttalǵan balalarmen jumystyń naqty baǵdarlamasyn qalyptastyrý mańyzdy dep esepteidi.
«Qazaqstan Respýblikasynyń Ákimshilik quqyq buzýshylyq týraly kodeksine ózgerý engizip, bilim berý uiymynyń basshysy bilim berý protsesine qatysýshyǵa bailanysty býlling/kiberbýlling jaǵdailary týraly ýákiletti organdarǵa habarlamaǵany úshin jaýapkershilik engizý qajet. Mektepterde oqýshylardyń ózara janjaldasýy men teketiresiniń, basqa da quqyq buzýshylyqtyń aldyn-alý úshin áleýmettik ońaltý men tatýlastyrý qyzmetterin qurý mańyzdy», - dedi depýtat.
