Senator Baqytjan Jumaǵulov Úkimet basshysynyń atyna depýtattyq saýal joldady. Onda Jetisý jerinde, Uly Jibek jolynyń boiynda ornalasqan, tarihy tereńnen tamyr tartatyn Qapal aýylynyń búgingi jai-kúiine qatysty másele kóterilgen, dep habarlaidy "Ult aqparat".
Baqytjan Jumaǵulov Qapaldyń irgesi bekinis retinde 1847 jyly qalanǵanymen, shejiresi sonaý Túrki dáýirine, Qimaq memleketine baryp tireletinin aitty.
Senator atalǵan derekterdi tizbektei kele, Qazaqstannyń qasietti jerleriniń kartasy daiyndalyp jatqan qazirgi kezde osyndai san ǵasyrlyq tarihy bar oryndar eskerýsiz qalmasa eken degen usynysyn aitty.
«Elbasymyzdyń «Uly dalanyń jeti qyry» atty maqalasynan keiin respýblika boiynsha qasietti oryndar iriktelip jatyr. Bul tarihymyzdy tanýǵa, týǵan ólkemizdiń ǵajaiyp jerlerin aiqyndaýǵa múmkindik beredi», – dedi Baqytjan Jumaǵulov.
Sonymen qatar senator bekinis retinde salyna bastaǵan kezeńde, iaǵni osydan eki ǵasyr buryn turǵyzylǵan nysandardy saqtap qalý máselesine de nazar aýdardy.
«XIX ǵasyrdyń eskertkishi bolyp sanalatyn úilerdiń bet jaǵy ǵana saqtalypty. Eski eki meshit úii qaraýsyz qalyp, qulaǵan. Aýyldyń rýhani ortalyǵy bolǵan aqyn Sara men Fatima Ǵabitova mýzeileriniń izi de joq. Ondaǵy qundy eksponattar qaida?», – degen Baqytjan Jumaǵulov bul jergilikti halyqtyń janaiqaiy ekenin aitty.
Osyǵan orai senator Premer-Ministrden sáýletshiler, tarihshylar, ádebietshiler, etnograftardan turatyn arnaiy komissiia qurýdy, Qapal aýylynyń mádeni-tarihi eskertkishterin qorǵaý úshin tiisti sharalar qabyldaýdy jáne olardy Úkimet qorǵaýyndaǵy sanattar qataryna qosýdy surady.
