Foto ashyq derekkózden alyndy
Búgin Senattyń jalpy otyrysynda depýtat Sergei Ershov Premer-Ministr Álihan Smaiylovtyń atyna joldaǵan depýtattyq saýalynda elimizdiń ónerkásip qaýipsizdigindegi júieli máseleler týraly sóz qozǵady, dep habarlaidy Kazinform.
Senatordyń aitýynsha, «Arselor Mittal» kásipornyndaǵy apattar júieli túrde qaitalanyp keledi. Qaiǵyly oqiǵalardyń negizgi sebepteriniń biri – eskirgen jabdyqty paidalaný.
«ArselorMittal Temirtaý» AQ jumys istegen jyldary kómir qabattaryn aldyn ala gazsyzdandyrý boiynsha jumystardy tiisti deńgeide júrgizbegen, bul - osyndai qaiǵyly oqiǵalardyń basty sebebi. Ótken ǵasyrda shyǵarylǵan qural-jabdyqtar áli de qoldanylyp jatyr. Tozǵan jabdyq jumysshylardyń ómirine jáne densaýlyǵyna qaýip tóndiretini anyq. Qazir kóptegen ónerkásiptik kásiporyndardyń ieleri jabdyqty aýystyrýǵa aqsha únemdep, ónerkásiptik qaýipsizdik saraptamasyn júrgizýmen shekteledi. Bul turǵyda óndiristerdiń qaýipsizdigin baǵalaýdyń obektivtiligi úshin osy saladaǵy ýákiletti organǵa qaýipti óndiristik nysandardy jańartý men tehnikalyq qaita jaraqtandyrýdyń jiyntyq josparyn kelisý, sondai-aq kásiporyndardyń ony ýaqtyly oryndaý jónindegi mindetin bekitý fýnktsiiasyn berý oryndy dep sanaimyz», - dedi Sergei Ershov.
Depýtat ónerkásip qaýipsizdigi salasyndaǵy tiisti qadaǵalaýdy óndiristik baqylaý qyzmetiniń mamandary atqaratynyn atap ótti. Bul qyzmetkerler anyqtaǵan kemshilikter erekshe nazarǵa alynbaidy. Sebebi olar jeke óndiristik baqylaý qyzmetiniń mamany, iaǵni osy kásiporynnyń basqa qyzmetterinde jumys isteidi.
«Qazirgi kezde qoǵamda atalǵan tragediiaǵa kináli adamdardy qylmystyq jaýapkershilikke tartý týraly másele ádil kóterilip otyr. Qaýpi joǵary salalarǵa qatysty memleket jaǵynan qatań baqylaý qajet. Osyndai qaiǵyly oqiǵalarǵa kináli adamdar jazanyń jeńil túrimen qutylyp ketpeýi kerek. Qylmystyq zańnama normalary ónerkásiptik qaýipsizdikti qamtamasyz etýdiń tiimdi quralynyń birine ainalýy tiis», - dedi senator.
