Búgin Elbasy Nursultan Nazarbaevtyń «Birlese bilgen el bárin jeńedi» atty maqalasy jaryq kórdi. Osy oraida Parlamenti Senatynyń depýtaty Dúisenǵazy Mýsin óz oiymen bólisken bolatyn, dep habarlaidy QazAqparat.
«Álemdi sharpyǵan koronavirýs pandemiiasy qai elge bolsyn ońaiǵa tiip otyrǵan joq. Osyndai qiyn qystaý jaǵdaida bizde aldymen bereke-birlik kerek. Osynaý el basyna kún týǵan sátte Qazaqstan Respýblikasynyń Tuńǵysh Prezidenti, Elbasy Nursultan Nazarbaev óz úndeýin joldap otyr. Biz Elbasy aitqandai, budan da qiyn talai zamandy bastan keshirdik. Odaq ydyrap, Táýelsiz el bolǵan jyldary talai qiyndyq bastan ótti. Biraq Elbasynyń saliqaly saiasatynyń arqasynda búgingidei damý deńgeiine jetip otyrmyz», - dedi D. Mýsin.
Senatordyń pikirinshe, búginde álemge qaýip tónip otyrǵan syn saǵatynda aldymen halyqtyń ishki yntymaǵy berik bolýy tiis.
«Búginde Memleket basshysy Qasym-Jomart Toqaevtyń tapsyrmasymen, Úkimettiń sheshimimen el amandyǵy men ekonomikasyn saqtaý maqsatynda shuǵyl sharalar qabyldanyp jatyr. Onyń ishinde shaǵyn jáne orta biznes pen aýyl sharýashylyǵy salasyna basa nazar aýdarylyp, qoldaý kórsetilýde», - dedi ol.
Sonymen qatar, senator aýyl sharýashylyǵy men biylǵy egistik jaǵdaiyna qatysty óz pikirin alǵa tartty.
«Bizde aýyl sharýashylyǵyna qajetti resýrstardyń bári bar. Prezident taiaýda ǵana óz úndeýinde janar-jaǵar mai baǵasyn tómendetý, aýyl sharýashylyǵyna qosymsha qarjy bólý jumystaryn Úkimetke naqty tapsyrdy. Biylǵy egistik oidaǵydai bolady degen senimdemiz. Bul degenimiz erteńgi kúngi azyq-túlik qaýipsizdigimizdi qamtamasyz etý degen sóz», - dedi depýtat.
Onyń aitýynsha, Elbasy óz úndeýi arqyly eline odan ári damý baǵytyn kórsetip otyr.
«Osyndai syn saǵatynda Elbasy halqyna batasyn berdi, jol kórsetip, bizde bar múmkindikterge basa nazar aýdardy», - dedi D.Mýsin.
.jpeg)