Senator Nariman Tóreǵaliev elimizdiń Premer-Ministrine joldaǵan depýtattyq saýalynda Batys Qazaqstan oblysynyń ońtústigindegi 4 aýdannyń, onyń ishinde Bókei ordasy, Jánibek, Qaztalov, Jańaqala aýdandarynyń turǵyndary tap bolyp otyrǵan ózekti máseleni kóterdi, dep habarlaidy "Ult aqparat".
Onyń aitýynsha, qazirgi ýaqytta aimaqta sýmen jabdyqtaý máselesi asa mańyzdy bolyp otyr. Bul óńir negizinen mal sharýashylyǵymen ainalysady jáne Reseiden sý alýda. Búgingi tańda Edil ózeninen Reseidiń Saratov, Volgograd oblystary arqyly oblystyń ońtústik aimaqtaryna aǵyp keletin sý mólsheri aitarlyqtai azaidy. Sonymen qatar, jyl saiyn sý alý shyǵyndary ósip keledi.
Batysqazaqstandyqtardyń naqty muqtajdaryna qosymsha 131 mln tekshe metr sý qajet.
Oblys aldynda turǵan negizgi mindetterdiń biri mal basyn kóbeitý, ony óńdeý jáne eksporttaý bolyp tabylady. Sý tapshylyǵy bul maqsatty júzege asyrýǵa aitarlyqtai kedergi keltirip keledi.
«Sońǵy jyldary sharýa qojalyqtary memlekettik baǵdarlamalardyń kómegimen shetelden asyl tuqymdy mal satyp alýda. Biraq qazirgi problemalardyń kesirinen barlyq maldan aiyrylyp qalý qaýpi bar», - deidi senator.
Nariman Tóreǵaliev qarjylandyrý máselesin de qozǵady. Depýtattyń sózine qaraǵanda, ótken jyly 2021-2023 jyldarǵa arnalǵan respýblikalyq biýdjetti bekitý kezinde batys óńiriniń turǵyndaryna sý jetkizý shyǵyndaryn óteý máselesi qoldaý tappady.
Senator óz saýalynda Úkimet basshysynan biylǵy jyldyń aqpan-naýryz ailarynda biýdjetti naqtylaý kezinde 131 mln m3 kóleminde sý jetkizý jónindegi shyǵystarǵa qosymsha 3,5 mlrd teńge bólýdi surady. Bul Batys Qazaqstan oblysynda mal sharýashylyǵyn damytýǵa múmkindik beretin qarjy kólemi.
