Senator Aqmaral Álnazarova Qazaqstanda balalar arasynda artyq salmaq qosý kóbeiip bara jatqany týraly aitty, dep habarlaidy "Ult aqparat".
«Qazaqstandaǵy balalar maily, qanty men tuzy kóp ónimderdiń kólemdi marketinginiń yqpalynda qalǵanyn moiyndaý kerek. Bul bizdiń balalardy aýqymdy marketing áserinen qorǵaý jáne shekteý qajettigin kórsetedi», - dedi depýtat Senattyń jalpy otyrysynda jariialaǵan depýtattyq saýalynda.
Qazaqstandyq ulttyq qoǵamdyq densaýlyq saqtaý ortalyǵynyń zertteýshileri monitoring júrgizip, memlekettik teledidardaǵy tamaq ónimderi jarnamasynyń aýqymy men sipatyna baǵa berdi. Alty ulttyq telearnadaǵy, onyń ishinde balalar arnasynan 10 myńnan astam jarnama qaralyp, shamamen 370 saǵat efir ýaqytyn quraityny anyqtaldy. Senator ziiandy tamaq ónimderi men alkogolsiz sýsyndardyń marketingi balalardyń shamadan tys tolysýynyń kóbeiip ketýine tikelei bailanysty dep sanaidy.
«Ortasha alǵanda, 8-10 jas aralyǵyndaǵy balalardyń 25,7 paiyzy teledidar kórýge eki nemese odan da kóp saǵat ýaqyty ketedi jáne kúnine shamamen 13 tamaq jarnamasyn, al jylyna 4 700 jarnama kóredi. Teledidardaǵy barlyq jarnamanyń 32,8 paiyzy azyq-túlik ónimderiniń jarnamasy. Eń jii jarnamalanatyn taǵam ónimderiniń qatarynda quramynda qanty bar sýsyndar tur, olardyń mólsheri 22 % bolsa, shokolad pen energetikalyq batondarǵa qatysty 17 paiyz boldy», - dedi Aqmaral Álnazarova.
Senator elimizdiń zańnamalyq aktilerine ziiandy tamaq ónimderiniń marketingin shekteitin jáne retteitin, durys tamaqtaný týraly aqparatty barlyq BAQ-ta , sonyń ishinde internette tolyq kólemde alýǵa quqyq beretin tiisti ózgerister men tolyqtyrýlar engizý múmkindigin qaraýdy surady.
