Abai oblysyndaǵy «Semei ormany» memlekettik orman tabiǵi rezervatynda orman órtin sóndirý jumystary jalǵasyp jatyr, dep habarlaidy ult.kz.
Ekologiia jáne tabiǵi resýrstar ministrliginiń málimetinshe, 16 shilde saǵat 14:50-degi jaǵdai boiynsha tilsiz jaýmen kúreske rezervattyń memlekettik orman kúzetiniń 97 qyzmetkeri men 38 tehnikasy, Tótenshe jaǵdailar ministrliginiń 158 qyzmetkeri men 22 tehnikasy, Ishki ister ministrliginiń 101 qyzmetkeri men 25 tehnikasy jumyldyrylǵan.
Sondai-aq órtti aýyzdyqtaýǵa «Qazaviaormanqorǵaý» kásipornynyń eki tikushaǵy, Qorǵanys ministrliginiń Mi-17 jáne Ulttyq qaýipsizdik komitetiniń Mi-8 tikushaǵy tartylǵan.
Áýe tehnikasy arqyly osy ýaqytqa deiin 82 márte sý tógildi. Onyń ishinde «Qazaviaormanqorǵaý» tikushaqtary – 58, Qorǵanys ministrliginiń Mi-17 tikushaǵy – 19, al UQK-niń Mi-8 tikushaǵy 5 ret sý shashqan.
Aldyn ala málimet boiynsha, órttiń aýmaǵy shamamen 60 gektardy quraidy. Órt qaraǵaily orman alqabynda tirkelgen, keibir ýchaskelerde tómengi órt joǵarǵy órtke ulasqan.
Qazir órtti oqshaýlaý jáne tolyq sóndirý jumystary jalǵasýda. Úkimettiń málimetinshe, jaǵdai Premer-ministrdiń jeke baqylaýynda, al jaýapty memlekettik organdardyń basshylary oqiǵa barysy týraly saǵat saiyn jedel aqparat berip otyr.
