Jetisý oblysynda ýran kontsentratyn Qazaqstannan zańsyz shyǵarýǵa áreket jasaǵan alty adamǵa qatysty sot úkimi shyqty, dep habarlaidy ult.kz.
Tergeý málimetinshe, sottalýshylar iadrolyq materialdarmen zańsyz ainalysyp, ýran kontsentratyn Qytaiǵa ótkizýdi kózdegen. Olar uiymdasqan túrde áreket etip, radioaktivti zattardy zańsyz iemdený, saqtaý, tasymaldaý jáne memlekettik shekara arqyly alyp ótýdiń shemasyn qurǵan.
Is materialdaryna sáikes, qylmystyq jospar birneshe kezeńnen turǵan. Aldymen ýran kontsentraty óndiristik kásiporyn aýmaǵynan jasyryn shyǵarylǵan. Keiin ol ártúrli adamdar arqyly tasymaldanyp, shekaradan ótkizilmek bolǵan.
Alaida «Nur Joly» ótkizý beketinde júrgizilgen shekaralyq baqylaý kezinde kúdikti júk anyqtaldy. Saraptama nátijesinde tárkilengen zattardyń ýran kontsentraty ekeni jáne onyń radioaktivtilik deńgeii belgilengen normadan birneshe ese joǵary bolǵany belgili boldy.
Sot sheshimimen úsh aiyptalýshy 7 jyl 6 ai merzimge bas bostandyǵynan aiyryldy. Taǵy eki adam 2 jyl 6 aiǵa sottalsa, bir sottalýshy 4 jyl 6 aiǵa bas bostandyǵynan aiyryldy.
Barlyǵy jazalaryn ortasha qaýipsizdik mekemelerinde óteitin bolady.
