Qazaqstannyń Ulttyq bankiniń basshylyǵy devalvatsiiaǵa qatysty pikir bildirdi, dep habarlaidy Sputnik Qazaqstan tilshisi.
Bank tóraǵasynyń orynbasary Oleg Smoliakovtyń sózine qaraǵanda, birinshi toqsannyń qorytyndysy boiynsha jariialanǵan tólem balansynyń statitikasy boiynsha taýarlar men qyzmetterdiń aiyrbasy +800 million AQSh dollaryn quraidy.
"Máselen, ótken jyly birinshi toqsanda - 900 million dollar bolǵan. Negizi, tólem balansynyń tarihyna qarasaq, bizde aǵymdaǵy operatsiialardyń "defitsittik esepshoty" jii bolady. Bul degenimiz elge keletin valiýtaǵa qaraǵanda aqsha jumsaýymyz basym. Al ótken jyldyń tórtinshi toqsanynda +1,5 milliard AQSh dollary boldy. Oǵan birinshi toqsannyń +800 millionyn qosyńyz, sonda taza 2,4 milliard dollar elge kelip otyr. Ol ketetin aqshadan kóp", - dedi Smoliakov jýrnalisterge bergen suqbatynda.
Onyń aitýynsha, qazirgi munai baǵasy, rýbldiń baǵamy, depozitterdiń dinamikasy jáne taǵy basqa faktorlar bir qalypty jáne teńgeniń baǵamyna aitarlyqtai áser etip turǵan joq.
"Búginde túrli qaýesetter devalvatsiia týraly áńgimeni kóbeitip otyr. Ulttyq bank valiýtanyń baǵamyn rettemeidi. Bizdiń negizgi mindetimiz – infliatsiia. Ony protsenttik mólsherleme arqyly rettep otyramyz. Al aiyrbas kýrsyn retteýge qatysty eshqandai mindetimiz joq", - dep atap kórsetti Ulttyq bank tóraǵasynyń orynbasary.
Al jýrnalisterdiń "Sailaýdan keiin devalvatsiia bola ma?" degen suraǵyna ol "joq" dep qysqa qaiyrdy. Biraq 9 maýsymnan keiin aitarlyqtai ózgeristerdiń bolmaitynyna kepildik bergen joq.
"Kýrs kúnde ózgerip jatady. Biraq aitarlyqtai ózgerister bolmaýy kerek. Másele mynada, qazirgi kezde biz múldem basqa jaǵdaida ómir súrip jatyrmyz. Biraq áli kúnge deiin artqa jaltaqtap jatamyz. Ol kezde aqsha-kredittik rejimimiz basqasha boldy. Kýrstyń naqty baǵamy belgilenip otyrdy. Biz sanaly túrde kýrstyń aýytqýyn barynsha tómendep, ózimiz rettep otyrdyq. Sodan neshe túrli qaýip-qaterlerdiń saldarynan devalvatsiia bolatyn. Qazir múldem basqasha rejim", - deidi Oleg Smoliakov.
