Qazir áleýmettik jelilerde táýligine bir taqyrypty talqylamasaq tura almaityn halge jetkenimiz shyndyq. Máselen, kúni keshe Facebook paraqshalarynda qazaq tili páninen testter jinaǵyndaǵy óreskel qatelik jónindegi beinejazba tarap, ǵalamtor qoldanýshylaryn dúr silkintti. Nazarbaev ziiatkerlik mektebine qabyldanýǵa úmitti oqýshylar úshin daiyndalǵan atalmysh oqýlyqty qazaq tili men ádebieti pániniń muǵalimi Qazbek Saǵidolda men Saýd Arabiia memleketindegi KAÝST ýniversitetiniń doktoranty Serikbolsyn Dúisembai qurastyrǵan.
Jigittiń jasy jiyrma beske endi ǵana aiaq basqan qos birdei jas pedagog matematika, qazaq tili pánderinen testter, logikalyq suraqtar qurastyrýmen eki-úsh jyldan beri ainalysyp keledi. Kereký óńirinen shyqqan Qazbek pen Serikbolsyn óz isterine asqan jaýapkershilikpen qarap, uqyptylyqty ózgeden buryn ózderinen talap etip úirengen. Az sóilep, kóp is tyndyratyn ári týǵan eliniń tiline, bolashaǵyna bei-jai qaramaityn mundai jas mamandardyń qurastyrǵan jinaǵynan «MS Sailaýbekke» qatysty saýaldyń tabylýy basynda bárimizdi de abdyratyp jibergeni jasyryn emes. Degenmen, áleýmettik jelidegi qoldanýshylar sekildi birden dúrlikpei, sebebin anyqtap, aqiqatqa kóz jetkizýge tyrystyq. Máseleniń baiybyna barmai turyp, bázbireýler sekildi oǵan baǵa bere salýdy kásibimizge syn dep túsindik. Sóitip, oqýlyqty qurastyrýshylardyń biri Qazbek Saǵidoldany sózge tartýdyń sáti tústi.
- Qazbek myrza, mynany aityńyzshy, mundai qatelikke qalaisha jol berip júrsizder?
- Alǵash osy jinaǵymyzdy shyǵarmaq bolǵanda ártúrli test tapsyrmalaryn qarastyrdyq, bilim berý ortalyqtarynan testter aldyq. Sóitip, san alýan nusqalardy salystyrdyq, arasynda «álgi suraq» ta boldy. Biz daiyn mátinderge, suraqtarǵa qarap óz testterimizdi qurastyra bastadyq. Dál osy mátini bar nusqa bizdiń kompiýterimizde byltyr da bar edi, alaida, ony jaryqqa shyǵarý degen oiymyzda múlde bolmaǵan-tyn. Sol sebepti de byltyrǵy basylymda bul mátin joq. Biylǵy basylymǵa nusqalarymyzdy jańartqan kezde jańaǵy mátin men suraq kirip ketken. Ókinishke qarai, der kezinde baiqamai qalyppyz.
- Sonda sizder qurastyrǵan oqýlyqtardy eshkim teksermei me?
- Bizdiń kitaptarymyz resmi túrde oqýlyq retinde sanalmaidy. Tek qosymsha daiyndyq quraly bolǵandyqtan ony ózimizden basqa eshkim teksermeidi.
- Dál osy «suraqtyń» abaisyzda ketip qalǵanyn kitap baspadan shyqqanda baiqadyńyzdar ma, əlde tutynýshylar habarlasty ma?
-Umytpasam, 16 qańtar kúni Shymkent qalasynan Jomart esimdi aǵamyz habarlasyp, kitapta osyndai mátinniń júrgenin aityp, ókpesin bildirdi. Biz jibergen qateligimiz úshin keshirim surap, mátin men saýaldy kelesi basylymnan alyp úlgerdik. Áitpese, ol da baspaǵa keteiin dep turǵan bolatyn.
- Atalmysh suraq kezdesetin nusqanyń qansha danasy taralyp ketti? Sosyn bul suraq qandai saýalmen almastyryldy?
- 100 danamen taraldy. Keiingi basylymda bul mátin esepshot týraly saýalmen almastyryldy.
- Áleýmettik jelilerdegi syn-pikirlerdi qalai qabyldadyńyz?
- Árine, ońai tidi dep aita almaimyn. Degenmen, bul – biz úshin úlken sabaq boldy. Keleside mundai óreskel qatelikti jibermeýge tyrysamyz. «Jańylmaityn jaq, súrinbeitin tuiaq bolmaidy» demekshi, budan keiin oqýlyqtarǵa asqan uqyptylyqpen qaraimyz dep ýáde beremiz.
- Biz de soǵan tilekshimiz. Jumystaryńyz alǵa basa bersin!
P.S. Mineki, qurmetti oqyrman, qatelik degen osy eken dep kimdi bolsyn jónsiz synai berýge bolmaitynyna kóz jetkizgendeimiz. Buǵan deiin eshbir ata-ananyń ne oqýshylardyń synyna ushyrap kórmegen jas pedagogtardyń óreskel qatelik jiberýdegi bizge beimálim tustaryn ózderinen surap bildik. Bizdiki – aqiqatyn anyqtaý, al, ony oń ne teris túsiný – óz erkińizde!
Suqbattasqan Ermurat NAZARULY
Ult portaly
Uqsas jazbalar:
