Májilis depýtaty Ashat Aimaǵambetov UBT-dan joǵary ball jinaǵan túlekterge páter men avtokólik syilaý bastamasyna qatysty pikir bildirdi, dep habarlaidy ult.kz.
Parlamenttiń birlesken otyrysynan keiingi kýlýarda depýtat eń aldymen 130 jáne 140 ball jinaǵan mektep túlekterin quttyqtap, bul jetistik úlken eńbektiń nátijesi ekenin aitty.
«Bul – úlken tabandylyqtyń, bilimniń, biliktiliktiń jáne ata-ana, bala men mekteptiń úlken eńbeginiń nátijesi. Sondyqtan bul shyn máninde qýanarlyq jaǵdai», – dedi ol.
Sondai-aq Aimaǵambetov joǵary nátije kórsetken túlekterge túrli syilyqtardyń berilýin qalypty jaǵdai dep sanaitynyn jetkizdi. Onyń pikirinshe, mundai qadamdardyń astarynda bilim berý ortalyqtarynyń marketingtik maqsaty da bolýy múmkin.
«Eger osy balalarǵa páter, avtokólik syilap jatsa, meniń oiymsha, bul jaman emes. Biraq biz bir máseleni túsinýimiz kerek. Munda marketing máselesi de bar. Óitkeni bir jaǵynan kompaniialardyń atyn ári qarai áigili etý, “bizdiń túlek osyndai múmkindikke qol jetkizdi” dep kórsetkisi keledi», – dedi depýtat.
Sonymen birge Májilis depýtaty qysqa merzim ishinde oqýshyny erekshe ádispen daiyndap shyǵaratyn «siqyrly tehnologiia» joq ekenin atap ótti.
Onyń aitýynsha, joǵary nátije – eń aldymen mektep muǵalimderiniń kúndelikti eńbegi, ata-ananyń qoldaýy jáne oqýshynyń óziniń talpynysynyń jemisi.
«Eger bala 130-140 ball alsa, Garvardqa, Nazarbaev ýniversitetine tússe, bul bizdiń bilim berý júiesiniń, mekteptegi kúndelikti eńbegi kórinbei jatqan muǵalimderdiń eńbegi. Buny ortalyqtardyń eńbegi dep aitpaýymyz kerek. Olardyń da eńbegi bar, árine. Biraq negizinen ol muǵalimderdiń eńbeginiń, ata-ananyń qoldaýynyń, balanyń óz eńbeginiń úlken nátijesi», – dep túiindedi Ashat Aimaǵambetov.
