20 qarashada ótetin kezekten tys prezident sailaýy kezinde elimizdegi 86 ýchaskede daýys berý 1 saǵat buryn bastalady. Bul týraly búgin QR Ortalyq sailaý komissiiasynyń tóraǵasy Nurlan Ábdirov aitty, dep habarlaidy QazAqparat.
«Ókilettikterge sáikes, sailaý zańnamasynda kózdelgen tártippen tiisti aýmaqtyq komissiialar daýys berýdi bastaýdyń ózge ýaqytyn belgileý jóninde sheshim qabyldady. Oblystardyń, Astana, Almaty, Shymkent qalalarynyń aýmaqtyq komissiialarynan usynylǵan jedel málimetter boiynsha tiisti aýmaqtyq komissiialardyń sheshimderimen 86 sailaý ýchaskesinde daýys berý jergilikti ýaqyt boiynsha tańǵy saǵat 06.00-de bastalady. Qala quraýshy kásiporyndardyń aýysymdyq jumys kestesi eskeriledi. Onyń ishinde 47-si - azamattardyń ýaqytsha bolatyn jerlerindegi ýchaskeler», - dedi ol OSK otyrysynda.
Onyń atap ótýinshe, saǵat 20.00-ge deiin daýys berýdiń aiaqtalý ýaqytyn belgileý boiynsha sheshimder qabyldanǵan joq.
«Áskeri bólimderde, statsionarlyq emdeý-profilaktikalyq mekemelerde, alys jáne jetý qiyn aýdandarda, shalǵaidaǵy mal sharýashylyǵy ýchaskelerinde, demalys úilerinde, sanatoriilerde, tergeý izoliatorlary men ýaqytsha ustaý oryndarynda, sondai-aq Qazaqstannyń shet memleketterdegi ókildikteri janynan qurylǵan 514 ýchaskelik sailaý komissiiasy tizimine engizilgen barlyq sailaýshylar daýys berse, kez kelgen ýaqytta daýys berý aiaqtaldy dep jariialana alady», - dedi Nurlan Ábdirov.
