20 قاراشادا ٶتەتٸن كەزەكتەن تىس پرەزيدەنت سايلاۋى كەزٸندە ەلٸمٸزدەگٸ 86 ۋچاسكەدە داۋىس بەرۋ 1 ساعات بۇرىن باستالادى. بۇل تۋرالى بٷگٸن قر ورتالىق سايلاۋ كوميسسيياسىنىڭ تٶراعاسى نۇرلان ەبدٸروۆ ايتتى, دەپ حابارلايدى قازاقپارات.
«ٶكٸلەتتٸكتەرگە سەيكەس, سايلاۋ زاڭناماسىندا كٶزدەلگەن تەرتٸپپەن تيٸستٸ اۋماقتىق كوميسسييالار داۋىس بەرۋدٸ باستاۋدىڭ ٶزگە ۋاقىتىن بەلگٸلەۋ جٶنٸندە شەشٸم قابىلدادى. وبلىستاردىڭ, استانا, الماتى, شىمكەنت قالالارىنىڭ اۋماقتىق كوميسسييالارىنان ۇسىنىلعان جەدەل مەلٸمەتتەر بويىنشا تيٸستٸ اۋماقتىق كوميسسييالاردىڭ شەشٸمدەرٸمەن 86 سايلاۋ ۋچاسكەسٸندە داۋىس بەرۋ جەرگٸلٸكتٸ ۋاقىت بويىنشا تاڭعى ساعات 06.00-دە باستالادى. قالا قۇراۋشى كەسٸپورىنداردىڭ اۋىسىمدىق جۇمىس كەستەسٸ ەسكەرٸلەدٸ. ونىڭ ٸشٸندە 47-سٸ - ازاماتتاردىڭ ۋاقىتشا بولاتىن جەرلەرٸندەگٸ ۋچاسكەلەر», - دەدٸ ول وسك وتىرىسىندا.
ونىڭ اتاپ ٶتۋٸنشە, ساعات 20.00-گە دەيٸن داۋىس بەرۋدٸڭ اياقتالۋ ۋاقىتىن بەلگٸلەۋ بويىنشا شەشٸمدەر قابىلدانعان جوق.
«ەسكەري بٶلٸمدەردە, ستاتسيونارلىق ەمدەۋ-پروفيلاكتيكالىق مەكەمەلەردە, الىس جەنە جەتۋ قيىن اۋدانداردا, شالعايداعى مال شارۋاشىلىعى ۋچاسكەلەرٸندە, دەمالىس ٷيلەرٸندە, ساناتورييلەردە, تەرگەۋ يزولياتورلارى مەن ۋاقىتشا ۇستاۋ ورىندارىندا, سونداي-اق قازاقستاننىڭ شەت مەملەكەتتەردەگٸ ٶكٸلدٸكتەرٸ جانىنان قۇرىلعان 514 ۋچاسكەلٸك سايلاۋ كوميسسيياسى تٸزٸمٸنە ەنگٸزٸلگەن بارلىق سايلاۋشىلار داۋىس بەرسە, كەز كەلگەن ۋاقىتتا داۋىس بەرۋ اياقتالدى دەپ جارييالانا الادى», - دەدٸ نۇرلان ەبدٸروۆ.
