Saiasi partiialardyń Májiliske ótý shegin 7-den 5% tómendetýimiz kerek. Bul týraly 7-inshi shaqyrylǵan Parlamenttiń alǵashqy otyrysynda Prezident Qasym Jomart Toqaev aitty, dep habarlaidy "Ult aqparat".
«Biz osy jolǵy sailaý naýqany karantin shekteýlerine qaramastan qanshalyqty qyzý ótkenine bárimiz kýá boldyq. Keibir partiialardyń Májilis pen máslihattarǵa ótýine sál ǵana daýys jetpei qaldy. Olardyń árqaisysynda belgili bir salany jetik meńgergen, bilimdi, bilikti azamattar da bar. Solar Parlamenttiń biik minberinen aitýǵa tiis kóptegen ózekti máselelerdi der kezinde ári oryndy kóterip júr. Osyndai partiialardyń ókilderi Parlamentke ótse, ondaǵy pikirtalasty qyzdyra túser edi, ortaq jumysqa tiimdi bolar edi», - dedi Memleket basshysy.
QR Prezidenti mundai azamattardyń zań shyǵarý jumysynyń sapasyn arttyrýǵa da súbeli úles qosary anyq ekendigin basa aitty.
«Sondyqtan saiasi partiialardyń Májiliske ótý shegin 7-den 5 paiyzǵa tómendetýimiz kerek. Osyndai sheshimdi qabyldaityn ýaqyt keldi. Óitkeni atalǵan norma zań júzinde tirkelgen partiialardy aldaǵy sailaýlarǵa qatysýǵa yntalandyrady. Sondai-aq eldegi saiasi básekeniń damýyna septigin tigizedi. Bul bastama memlekettik saiasatty júrgizý úshin halyqtyń pikirin neǵurlym kóbirek qamtyp, eskerip otyrýǵa múmkindik beredi», - dedi Qasym-Jomart Toqaev.
