Saiasi qýǵyn-súrginge ushyraǵandardy zertteý jumysy bir nemese eki jylda aiaqtalmaidy. Mundai pikirdi QR BǴM Filosofiia, saiasattaný jəne dintaný institýtynyń bas ǵylymi qyzmetkeri, filosofiia ǵylymdarynyń doktory, professor Baqytjan Satershinov bildirdi, dep habarlaidy QazAqparat.
Ǵalym Baqytjan Satershinovtyń aitýynsha, saiasi qýǵyn-súrgin qurbandaryn tolyq aqtaý týraly másele byltyr kóterildi.
«2020 jyly Memleket basshysy Qasym-Jomart Toqaev 31 mamyr – saiasi qýǵyn-súrgin jáne asharshylyq qurbandaryn eske alý kúnine orai úndeý jariialaǵan bolatyn. Prezident saiasi qýǵyn-súrgin qurbandaryn tolyq aqtaý jónindegi memlekettik komissiia qurý kerektigin tapsyrdy. Memlekettik komiisiianyń quramyna elimizdegi birneshe ministrliktiń ókilderi, memlekettik qyzmetkerler, ǵalymdar men sarapshylar kirdi. Komissiianyń tóraǵasy Qyrymbek Kósherbaev alǵashqy jiyndy jeltoqsan aiynda ótkizdi. Sol otyrysta atqaratyn jumys bekitilip, tapsyrmalar berildi»,- deidi Baqytjan Satershinov.
Sonymen qatar, ol 11 jumys toby qurylǵanyn aitty.
« 11 arnaiy jumys toby quryldy. Onyń birinshisi, qýǵyn-súrgin qurbandaryn aqtaý jónindegi metodologiialyq kishi komissiiasy. Sol siiaqty ártúrli kategoriia boiynsha jumys toptary quryldy. Top ókilderi jabyq arhivterdegi materialdarǵa qol jetkizý úshin arnaiy tekserýden ótti. Sodan keiin baryp jumysqa kiristi. Bizdiń top - saiasi qýǵyn-súrginge ushyraǵan, dástúrli din ókilderin zertteý, zerdeleý, talqylaý toby»,- deidi ǵalym.
Onyń aitýynsha, zertteý jumysy bir nemese eki jylda aiaqtalmaidy. Óitkeni, qýǵyn-súrgin uǵymynyń aýqymy keń.
«Quǵyn-súrgin qurbandaryn aqtaý jumystary 1953 jyldary bastaldy. Táýelsizdik alǵanan keiin 1993 jyly arnaiy zań qabyldandy. Sonyń aiasynda úsh myńnan asa adam aqtaldy. Qazirgi jumys tobynyń aldyndaǵy mindet - aqtalmaǵan adamdardy tabý. 1926 jyly qabyldanǵan Qylmystyq kodekstiń 58-baby boiynsha sottalǵandardyń bári belgili. Negizinen solar aqtalǵan. Basqa da baptar bar. Olar jabyq muraǵatta saqtaýly tur. Qupiia qujat bolǵandyqtan, arhivterdegi qujattardy zertteý kóp ýaqyt alady»,- deidi ol.
Spiker aqtalǵan adamdar kezinde el úshin eńbek etken bolsa olardyń esimin ulyqtaý qajet dep esepteidi.
«Qýǵyn-súrginge ushyraǵan azamattardyń arasynda eline eńbek sińirgender bolýy ábden múmkin. Mine, biz sol esimderdi zertteýimiz qajet. Olardyń erlikterin bolshaq urpaq bilýi tiis. Ol týraly ǵylymi eńbekter jazylýy kerek. Osynyń bári keshendi jumysty qajet etedi»,- dedi Baqytjan Satershinov.
