Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova qalada pnevmoniiaǵa shaldyqqandar týraly aityp berdi, dep habarlaidy QazAqparat.
«Kúnine koronavirýs infektsiiasy jáne pnevmoniiamen 350-400-ge jýyq adam aýrýhanaǵa jatqyzylady. Juqpaly aýrýlar jáne provizorlyq aýrýhanalarda adamdardyń sany búginde 2,5 myńǵa deiin ósip otyr. Onyń 91 paiyzy ortasha aýyrlyq dárejesinde, 9 paiyzy aýyr jáne óte aýyr. Olar jedel reanimatsiia bólimine birden túsedi. Negizi, sońǵy aptamen salystyrǵanda, naýqastardyń sany úsh esege deiin ósti»,-dedi ol.
Onyń sózine qaraǵanda, osy táýlikte reanimatsiia bóliminde 103 adam jatyr, onyń 51-i koronavirýs infektsiiasy bolsa, sonyń ishinde 22 adam jasandy tynys alý apparatyna qosylǵan. Ókinishke qarai, búginde 38 ólim jaǵdaiy tirkeldi. Olardyń 70 paiyzy - 60 jastan asqan adamdar.
«Pnevmoniiamen aýyratyn naýqastardyń sany táýligine 600 jaǵdaiǵa deiin ósti. Buryn 80 jaǵdaiǵa deiin bolatyn. Aptasyna 8,5 esege deiin joǵarylaýy baiqalyp otyr. 12 maýsymnan bastap, Nur-Sultan qalasyndaǵy meditsinalyq uiymdardyń tósek orny qoryn qaita qurýǵa bailanysty juqpaly jáne provizorlyq aýrýhanalardaǵy tósek orny sany 1351 orynǵa ulǵaityldy. Tek sońǵy úsh kúnde qosymsha 830 tósek daiyndaldy. Onyń ishinde búgin Ulttyq ǵylymi meditsinalyq ortalyqtyń bazasynda taǵy 200 infektsiialyq tósek daiyndalady. Sonymen, búginde koronavirýs infektsiiasymen kúresýge 3 135 tósek oryndyq 12 densaýlyq saqtaý uiymy jumyldyryldy. Qazirgi ýaqytta juqpaly jáne provizorlyq aýrýhanalarda jumys júktemesi 79 paiyzdy qurap otyr», - dedi basqarma basshysy.
