Qazaqstan shekarasyn zańsyz kesip ótken Qytai azamaty, etnikalyq qazaq Sairagúl Saýytbai isiniń basy-qasynda júrgen jýrnalist Sáýle Ábedinova Sputnik tilshisine bergen suhbatyn nazarlaryńyzǵa usynamyz!
Sáýle Ábedinova Saýytbaidyń isine kirisýine eń aldymen adami faktor áser etkenin aitty.
"Eń alǵash Sairagúldiń taǵdyry týraly Abai.kz saitynan oqydym. Sairagúldiń qainysy Nurbolattyń "Jeńgemdi shekara kúzet qyzmetkerleri alyp ketti" degen video úndeýinen keiin Facebook paraqshamda tikelei efir júrgizdim. Ol jerde Sairagúl Saýytbaidyń kúieýi Ýáli Islámmen suhbattastyq. "Atajurt" birlestigi meni oqityn aýditoriianyń keń ekenin aityp, Ýáli Islámmen tanystyrǵan bolatyn. Osyǵan deiin de oralmandar máselesin, Qytaidaǵy qandastar máselesin paraqshamda jazyp júrgenmin. Kóp uzamai Sairagúldiń taǵdyrymen betpe-bet keldik", — deidi jýrnalist.
Qazaqtyń tarihynda birinshi ret…
Sairagúldiń isimen tanysqan jýrnalist sol kúnnen bastap osy isti áiel retinde, ana retinde óz baqylaýyna alǵanyn aitty. Úshinshi kezekte ǵana kásibi maman, jýrnalist retinde bul máseleni qadaǵalaýym kerek dep sheshken. Sonymen qatar atalǵan isti sońyna deiin jetkizemin dep maqsat qoiǵan.
"Alǵashqy kezderi bizdiń jergilikti, burynnan osynda týyp-ósken qazaq qoǵamynyń nazaryna qandastar máselesi ilige bermeitin. Ol tek oralmandardyń óz máselesi bolyp qalatyn. Qandastar bilikten kómek surasa da, shaǵymdansa da, aryzdansa da tek óz sólinde ózi qainap jatqan áleýmettik top edi. Arasynda jergilikti jýrnalister ózekti máselelerge kelgende aralasty" — deidi Sáýle Ábedinova.
Jýrnalistiń aitýynsha, dál osy Sairagúldiń taǵdyryndai búkil alty alashtyń basyn qosqan másele qazaqtyń tarihynda birinshi ret bolyp otyr.
"Sairagúl Saýytbaidan saiasatker jasaýdyń qajeti joq"
"Sairagúlge Qytaidyń barlyq qupiiasyn jaiyp sal dep aitý adamgershilikke jatpaidy. Sairagúl saiasatker bolamyn dep nemese Qytaidyń qupiiasyn búkil álemge ashyp, Qytaimen birden soǵysty bastap ketemin dep kelgen joq. Sairagúl jasyryn kelip, bala-shaǵasymen qaýyshýdy ǵana oilady. Sondyqtan Sairagúl Saýytbaidan saiasatker jasaýdyń qajeti joq", — degendi aitty jýrnalist.
Sáýle Ábedinova Sairagúlge saiasi qural retinde qarap, ony qurbandyqqa shalyp jiberýdiń qajeti joq degen pikirde.
"Dál qazir Sairagúl sot sheshimin óz kúshine enýin kútip otyr. Sheshim 15 kúnde kúshine enedi. Odan keiin úsh ai ishinde ony bosqyn dep taný, tanymaýdy komissiia sheshedi",-deidi Sáýle Ábedinova.
"Qytai jaiyna qaldyrmaidy…"
Jýrnalistiń aitýynsha, Qytai Sairagúl Saýytbaidy jaiyna qaldyrmaidy.
"Ony bárimiz bilemiz. Sairagúl búkil aqparatty jaiyp salsa da, ózi biletin aqparatty eshkimge aitpai ishinde saqtasa da, Qytai ony jaiyna qaldyrmaidy. Dál osy máselede advokat QR Ulttyq qaýipsizdik qyzmetine birneshe ret Sairagúl Saýytbaidyń jeke basynyń qaýipsizdigin qamtamasyz etý týraly ótinish joldady", — deidi Sáýle Ábedinova.
Alaida advokattyń Ulttyq qaýipsizdik qyzmetine joldaǵan ótinishterine áli jaýap kelmegen.
Esterińizge sala ketsek, Qytai azamaty, shekaradan zańsyz ótti dep aiyptalǵan etnikalyq qazaq Sairagúl Saýytbaiǵa qatysty sot úkimi 1 tamyzda shyqty. Almaty oblysynyń Panfilov aýdandyq soty qandasymyzdy 6 aiǵa shartty túrde bas bostandyǵynan aiyryp, sot zalynan bosatty. Oǵan Qazaqstan aýmaǵynan shyǵarý týraly qosymsha jaza qoldanylmaidy. Sairagúl Saýytbai alty ai probatsiialyq baqylaýda bolady.
