Shymkentte Qairat Nurtastyń kontsertinen keiin aýyr jaǵdaida aýrýhanaǵa jetkizilgen 18 jastaǵy qyzdyń týysy kópshilikten kómek surap, áleýmettik jelide jazba jariialady, dep habarlaidy ult.kz.

Týysynyń aitýynsha, kontsert kezinde jinalǵan jurttyń arasynda qysylys bolyp, boijetken qulap qalǵan. Saldarynan ol qalyń toptyń aiaǵynyń astynda qalyp, aýyr jaraqat alǵan.

“Adamdy qulatyp, ólim aýzyna jetkenshe taptaityndai qalai sonsha qatygez bolýǵa bolady? Meniń baýyrymdy ne úshin uryp, taptadyńyzdar? Ol alty saǵattan beri jansaqtaý bóliminde, ómir men ólimniń arasynda jatyr. Qazir bizge óte aýyr. Ótinemin, aman qalsyn dep duǵa etińizdershi”, – dep jazdy qyzdyń týysy.

Shymkent qalalyq densaýlyq saqtaý basqarmasy zardap shekken 18 jastaǵy qyzdyń jaǵdaiy aýyr ekenin málimdedi.

Basqarmanyń habarlaýynsha, boijetkenge oqiǵa ornynda alǵashqy meditsinalyq kómek kórsetilgen. Keiin jedel járdem qyzmetkerleri ony aýrýhanaǵa jetkizgen. Qazirgi ýaqytta naýqas dárigerlerdiń úzdiksiz baqylaýynda bolyp, qajetti em qabyldap jatyr.

Aita keteiik, Gúlzira Aidarbekova Qairat Nurtas týraly synǵa núkte qoidy. 

Qairat Nurtas kim?

Qairat Nurtas – qazaqstandyq tanymal estrada ánshisi, akter jáne prodiýser. Ol 1989 jyly 25 aqpanda Túrkistan qalasynda dúniege kelgen. Óner jolyn jas kezinen bastap, qazaq estradasynda ózindik orny bar oryndaýshylardyń birine ainaldy.

Ánshiniń shyǵarmashylyǵynda mahabbat, saǵynysh, otbasy jáne adam sezimi taqyryptary keńinen qamtylǵan. Onyń “Arman”, “Aýyrmaidy júrek”, “Shyda júrek”, “Almaty túni” sekildi ánderi tyńdarman arasynda tanymal.

Qairat Nurtas ánshilikpen qatar kino salasynda da eńbek etip, birneshe kórkem filmge túsken. Ol “Ókinish”, “Arman” jáne “Súie bilseń” filmderi arqyly akter retinde de tanyldy.

Onyń shyǵarmashylyq jolynda anasy ári prodiýseri Gúlzira Aidarbekovanyń eńbegi zor. 2008 jyly ekeýi Kairat Nurtas Production prodiýserlik ortalyǵyn qurdy. Ánshi 2015 jyly MÝZ-TV syilyǵynda “Qazaqstannyń úzdik ártisi” atansa, 2016 jyly “Daryn” memlekettik jastar syilyǵyna ie boldy.

Qairat Nurtas J. Elebekov atyndaǵy estrada-tsirk kolledjinde bilim alǵan. Keiin T. Júrgenov atyndaǵy óner akademiiasynda jáne L. Gýmilev atyndaǵy Eýraziia ulttyq ýniversitetinde oqyǵan. Búginde ol qazaq estradasynda uzaq jyldar boiy óner kórsetip kele jatqan tanymal ánshilerdiń biri.

Derekkózder: Sputnik Qazaqstan⁠ jáne Qazaq radiosy⁠.