Tanymal telejúrgizýshi Dana Nurjigit jaqynda jaryq kóretin "Kóleńke. 115-1" atty kitabyna qatysty video jariialap, jalǵyzbasty ananyń taǵdyry týraly sóz qozǵady, dep habarlaidy ult.kz.
Telejúrgizýshi áleýmettik jelidegi paraqshasynda jańa týyndysynyń mazmunyna toqtalyp, kópshiliktiń nazaryn jalǵyzbasty áieldiń ómirindegi kúrdeli jaǵdaiǵa aýdardy.
Videoda ol jalǵyzbasty anaǵa aitylǵan keńesti mysalǵa keltirip, onyń sońy kútpegen qaiǵyly oqiǵaǵa ulasatynyn meńzegen.
"Jalǵyzbasty ana! Shyndyqqa tike qaraityn bolsaq, sen burynǵydai sulý adam emessiń. "Jalǵyzbasty áieldiń etegin ia el, ia jel ashady" degen sóz bar. Sondyqtan sóilesip júrgen bireýiń bolsa, eteginen usta da, táýekel et!" – degen sózderdi keltiredi telejúrgizýshi.
Alaida mundai keńeske qulaq asqan áieldiń ómiri múlde basqa arnaǵa burylady.
"Ol myqty azamat, syrlas dosynyń bul sózine qulaq túrdi. Biraq bul áńgime úlken qasirettiń basy bolatynyn ol kezde ol bilgen joq", – deidi Dana Nurjigit.
Belgili bolǵandai, bul áńgime telejúrgizýshiniń jeke ómirine qatysty málimdeme emes, onyń jýyrda jaryq kóretin "Kóleńke. 115-1" atty kitabyndaǵy oqiǵa jelisine arnalǵan.
Avtor beinejazba arqyly jalǵyzbasty ananyń taǵdyryn tanystyryp, bir ǵana sheshimniń adam ómirine qanshalyqty áser etýi múmkin ekenin kórsetkisi kelgen.
Aita keteiik, Dana Nurjigit buǵan deiin de stalking máselesin qoǵam nazarynda kóterip, áielderdiń qaýipsizdigi men quqyǵyn qorǵaý taqyrybynda pikir bildirip júrgen.
Dana Nurjigit kim?
Dana Nurjigit – qazaqstandyq tanymal telejúrgizýshi, jýrnalist jáne qoǵam qairatkeri. Ol kópshilikke otandyq televiziiadaǵy uzaq jylǵy qyzmeti arqyly tanyldy. Dana Nurjigit 1972 jyly 10 sáýirde dúniege kelgen. Ol eńbek jolynda aqparattyq jáne tanymdyq baǵdarlamalardy júrgizip, kórermenniń yqylasyna bólendi. Telejúrgizýshi "Qazaqstan" ulttyq telearnasynda qyzmet atqaryp, túrli televiziialyq jobalarǵa qatysty. Sonymen qatar ol "Habar" agenttiginde de jumys istedi. Jýrnalistika salasyndaǵy eńbegi úshin kásibi ortada tanymal boldy.
1995 jyly Qurmanǵazy atyndaǵy Qazaq ulttyq konservatoriiasyn támamdaǵan. Eńbek jolyn mýzyka salasynan bastap, keiin jýrnalistikaǵa bet burdy. 1997 jyly "Habar" agenttiginde jańalyqtar júrgizýshisi bolyp jumys istei bastady. Onyń kópshilikke keńinen tanylǵan jobalarynyń biri – "Dara jol" baǵdarlamasy. Bul baǵdarlamada elimizdiń damýyna úles qosqan tanymal tulǵalardyń ómiri men jetistikteri tanystyryldy. 2019 jyly Dana Nurjigit Prezident Jarlyǵymen Qazaqstan Respýblikasy Parlamenti Senatynyń depýtaty bolyp taǵaiyndaldy. Ol bul qyzmetti 2023 jylǵy qańtarǵa deiin atqardy. Senattaǵy jumysy aiaqtalǵannan keiin qaitadan shyǵarmashylyq qyzmetine oraldy.
