Saýd Arabiiasynyń murager hanzadasy Muhammed ben Salman Al Saýd senbide jahandyq klimattyq ózgeristerge qarsy eki iri bastama jariialady, dep habarlaidy "Ult aqparat".
Akhbar Al Saudiya jańalyqtar portaly habarlaǵandai, taq murageri koroldiktiń kógaldandyrý baǵdarlamasyn maquldady, onyń aiasynda aldaǵy onjyldyqtar ishinde 10 milliard kóshet egiledi.
Sonymen qatar, murager hanzada «Arab baýyrlarynyń kómegimen» «Jasyl Taiaý Shyǵys» baǵdarlamasyn iske qosýǵa nietti, ol búkil aimaqqa 40 milliard aǵash otyrǵyzýdy kózdeidi.
«Álemdegi jetekshi munai óndirýshi retinde bizdiń koroldik klimat ózgerýiniń saldarymen kúresýdegi jaýapkershilikti sezinedi, jasyl álem qurý jolynda jahandyq kóshbasshy bolýǵa tyrysady», - dedi Muhammed ben Salman.
Muhammed ben Salman atap ótkendei, Saýd Arabiiasy Koroldigi basqa eldermen «planetany qorǵaityn jasyl jol kartasyn jasaýda» ózara árekettesedi. Ol 2016 jyly qabyldanǵan «Saýd Arabiiasynyń kózqarasy: 2030» strategiialyq baǵdarlamasyn iske asyrý azamattardyń ómir súrý sapasyn arttyrýǵa múmkindik beretinin atap ótti.
